Ballet, baloncesto, fútbol sala masculino, fútbol sala feminino, judo, natación, patinaxe, predeporte, tenis, voleibol e ximnasia rítmica son algunhas das actividades nas que se puideron matricular durante este curso os e as rapazas do concello de Ames. Este sábado, no pavillón municipal de Bertamiráns, ofrecerase unha mostra do aprendido e do traballo realizado polos nenos e nenas durante os oito meses que duran estas actividades.

Os rapaces e rapazas de judo e baloncesto serán os primeiros en realizar sendas mostras, ás 16:40 horas. Farano seguidos polos pequenos e pequenas de pre-deporte, para que a continuación saian, por orde, o alumnado de ximnasia rítmica de Bertamiráns, de ximnasia rítmica do Milladoiro, o de patinaxe de Barouta, o de voleibol (actividade impartida polo CV Bruxas), de tenis, unha segunda de patinaxe, dúas mostras máis de ballet, unha exhibición de fútbol sala feminino (que en Ames imparte o FC Meigas) e, para rematar, a derradeira mostra da tarde realizada das patinadoras e patinadores do Club de Patinaxe Sarela. A xornada de clausura rematará arredor das 19:00 horas.

As escolas deportivas municipais do Concello de Ames volveron superar este curso os 1.500 usuarios e usuarias, sumando un total de 1.516 persoas que escolleron algunha das quince disciplinas que ofertou o Concello de Ames para a práctica deportiva durante a tempada 2015-2016.

O alcalde de Ames e concelleiro de Deportes, José Miñones, destaca que “o deporte e as actividades das escolas deportivas son unha boa forma de desenvolver unha vida saudable e adquirir valores tan importantes como a deportividade, o respecto e a tolerancia. Por este motivo, o Concello de Ames aposta ano tras ano polo desenvolvemento destas actividades que sempre acadan uns resultados moi positivos. Cómpre destacar que este ano houbo un incremento de usuarios/as neste servizo municipal”.

Matrícula para o curso 2016-17
Ademais das actividades para os máis novos e novas as Escolas Deportivas Municipais tamén ofrecen un programa para o público adulto. Este ano abríronse inscricións para cursos de aerobic; pilates; spinning; abdominais e glúteos; e ximnasia de mantemento. O día 1 de setembro abrirase de novo o prazo de matrícula neste servizo municipal, tanto para as actividades infantís como para as de adultos. O prazo de renovación de praza e de preinscrición nas novas actividades rematará o día 13 de setembro. Como soe ser habitual publicarase toda a información e maila oferta de actividades do curso 2016-2017 na páxina web municipal.