Dar a coñecer aos máis pequenos o seu entorno inmediato de forma que poidan desenvolverse no seu día a día e aprender sobre aquilo que teñen máis próximo son os obxectivos do programa "Coñecendo o entorno máis próximo". A escola infantil municipal A Madalena desenvolve un programa de saídas, que durante os dous últimos anos non se puido realizar devido ás restricións derivadas da pandemia pola Covid.

Durante este mes de maio volveron a recuperarse ditas actividades con dúas saídas nas que participou parte do profesorado e o alumnado de 2 a 3 anos de idade. A través destas actividades trátase que os nenos e nenas coñezan o seu entorno, así como aspectos deste fundamentais para a vida diaria.

Deste xeito, realizaron unha saída ao parque de Ventosa, na parroquia de Covas, para coa axuda da técnica municipal da Aula da Natureza, Patricia Reboreda, plantar carballos. Ademais, tamén visitaron o centro de terapia “O Fogar do meu burro”, situado na aldea de Lamas, pertencente á parroquia de Ames.

Os nenos e nenas da escola infantil A Madalena puideron achegarse á natureza e aos burros. Deste xeito, puideron montar nestes animais, así como acariñalos e cepillalos. Pero ademais, foi unha visita na que os nenos e nenas puideron experimentar coa música e o movemento grazas á colaboración dun especialista como é o músico e terapeuta, Tomas Rábanos.

Novas relacionadas:

El Correo Gallego: "Visita ata o Fogar do meu burro dende A Madalena"

Enfoques: "El alumnado de A Magdalena visita ‘O Fogar do meu Burro’"