Nas últimas semanas os escolares están tratando nas aulas o funcionamento das entidades locais e o sistema de elección dos gobernos. A visita de hoxe, que coincide co comezo das vacacións de Semana Santa, tiña por obxecto reforzar estes coñecementos, de maneira máis práctica e dinámica.    

O alcalde explicoulles que a Casa do Concello é a casa de todos os amesás e faloulles do traballo diario que desenvolve a administración local. “Para nós é moi importante que Ames, que é o Concello máis xove de Galicia e un dos que máis medra, conte con rapaces e rapazas formados porque vós sodes o futuro deste concello”, sinalou Santiago Amor. Deste xeito, animounos a seguir estudando para ampliar os seus coñecementos de cara ao futuro.

Unha das alumnas que participou na visita entregoulle ao alcalde unha lista con varias peticións feitas por ela mesma e polos seus compañeiros. Entre estas peticións figuraba a construción dun carril bici e a construción dunha pista de patinaxe. Tamén lle solicitaron que os parques infantís se adapten para que poidan ser usados por nenos con algún tipo de discapacidade. Antes de rematar a visita os rapaces e rapazas fixeron unha foto de grupo coas autoridades municipais diante da Casa do Concello e puideron subir nos coches da Policía Local de Ames.