[02-09-2014] O alcalde de Ames, Santiago Amor, e o conselleiro de Cultura, Educación e Ordenación Universitaria, Xesús Vázquez, visitaron esta mañá o CEP de Ventín, que está situado na localidade do Milladoiro, onde se executaron obras de ampliación por un importe de 1,27 millóns de euros, que se suman á reforma xa realizada anteriormente, que supuxo un investimento de 10.000 euros. O alcalde e o conselleiro estiveron acompañados polo concelleiro de Educación, Bernardo Moar, a concelleira de Cultura, María Eugenia Martín. Nesta visita tamén participaron o xefe territorial da Consellería de Educación na provincia da Coruña, Indalecio Cabana, e o director do centro educativo, Alfredo Rodríguez.
Dotación dun aparcamento
Ademais, no pasado mes de agosto o goberno municipal inicio o expediente de contratación de varias obras que están incluídas no Plan de Obras e Servizos da Deputación Provincial da Coruña correspondentes ao exercicio 2014. Entre estes proxectos atópanse as obras para dotar dun aparcamento ao CEP de Ventín.
O aparcamento do colexio de Ventín disporá dunha superficie de 1.715 metros cadrados (49 x 35 metros). Os traballos que se realizarán serán o acondicionamento do terreo coa correspondente nivelación e rasanteo. Posteriormente, executarase a pavimentación desta superficie con quince centímetros de grava e aplicarase un triple tratamento asfáltico.
Implantación da xornada continua
Por outra banda, cómpre destacar que dende o inicio deste curso implantarase a xornada continua no CEP de Ventín. Polo tanto o horario escolar pasará a ser de 9:20 h a 14:20 horas, de luns a venres. De seguido, entre as 14:20 h e as 16:20 horas, funcionará o servizo do comedor escolar, e por último, de 16:20 h a 18:20 horas aproximadamente, estará aberta a biblioteca do centro escolar.
O conselleiro de Cultura, Educación e Ordenación Universitaria, Xesús Vázquez, e o alcalde de Ames, Santiago Amor, visitaron esta mañá o CEP de Ventín tralas obras realizadas para a súa completa remodelación e ampliación. Neste sentido, o conselleiro de Educación salientou “a importancia desta actuación na que se realizou un investimento de 1,27 millóns de euros. Esta obra eleva a preto de 1,37 millóns de euros o investimento feito por parte da Xunta de Galicia neste colexio, que forma parte do Plan de Mellora de Bibliotecas Escolares (PLAMBE) e conta cunha aula dixital, e no que xa se teñen realizado dende o ano 2009 outras melloras, fundamentalmente na cuberta”.
O alcalde de Ames, Santiago Amor, agradeceu “o investimento que a Xunta de Galicia realizou nos últimos anos en Ames coa posta en funcionamento, o curso pasado, do novo IES do Milladoiro e coa ampliación das instalacións do CEP de Ventín, xa que se trataba dunhas obras de ampliación moi demandadas pola veciñanza amiense e que permitiron dar resposta ás necesidades que presentaba este centro educativo”.
Ampliación do CEP de Ventín
As obras de reforma e ampliación do CEP de Ventín supuxeron actuar na práctica totalidade do edificio, ampliando con zonas de nova construción a ala sur tanto en superficie como dotándoa dunha altura máis. A nova superficie resultante aloxa 7 aulas de educación primaria, un aula de usos múltiples e 2 aulas de apoio, ademais de zonas de servizos comúns e instalacións.
Deste xeito, o centro pasou de ter 18 unidades a ter 24, o que supón un incremento de 150 prazas para alumnas e alumnos, dando resposta ás necesidades da comunidade educativa. Esta ampliación permitiu incrementar nun 33% o número de prazas neste centro educativo, pasando das 450 que había antes ás 600 actuais.
Ademais das zonas de nova construción executáronse unha serie de reformas sobre a distribución existente, o que supón que se actúa practicamente na totalidade da edificación. Neste sentido modificouse a localización da biblioteca para aumentar a súa superficie e posibilitar o acceso directo desde o exterior, e trasladouse o cuarto de caldeiras e o local de cadros eléctricos, o que permitiu ampliar e mellorar o espazo do conserxe. Ademais das reformas indicadas, levouse a cabo a substitución de toda a instalación eléctrica e lumínica e a adaptación da instalación contra incendios.
No referido ao sistema construtivo, a prioridade foi realizar un deseño o máis lixeiro respondendo ás necesidades de funcionalidade dos edificios docentes e buscando, ao mesmo tempo, a súa durabilidade e facilidade de limpeza e mantemento.
Contido relacionado
El Correo Gallego: "O alcalde de Ames e o conselleiro de Educación visitan as novas instalacións do CEP de Ventín"
La Voz de Galicia: "El colegio de Ventín tiene 600 plazas tras una inversión de 1,27 millones"