O deporte e os obradoiros culturais son unha boa forma de desenvolver unha vida saudable e adquirir valores tan importantes como a deportividade, o respecto e a tolerancia. Por este motivo, o Concello de Ames aposta polo desenvolvemento destas actividades que sempre acadan uns resultados moi positivos de participación.

As actividades deportivas ofertadas polo Concello de Ames caracterízanse pola súa diversidade e por estar pensadas para todos os grupos de idade. Así, neste curso 2011- 2012, os e as amienses poderán gozar de seis obradoiros como son o de baile de salón, manualidades, teatro, xadrez, baile e música tradicional. A esta oferta hai que engadirlle as actividades propias das escolas deportivas como son aeróbic, ximnasia de mantemento, baloncesto, natación, predeporte, actividade física para discapacitados, pilates, tenis de mesa, spinning, patinaxe e tenis.

O programa de actividade física para discapacitados/as é gratuíto e non dispón de límite de prazas. En total son case 20 actividades das que todos e todas as amienses, de todas as idades, se poderán beneficiar. Entre os obradoiros culturais e as escolas deportivas ofértanse arredor de 1.700 prazas.

Todas aquelas persoas que estiveron inscritas no curso 2010-2011 xa puideron renovar a súa praza nas escolas deportivas e os obradoiros culturais que oferta o Concello de Ames. Agora a quenda é para as prazas libres e grupos de nova creación, este prazo de matrícula está aberto dende este mércores, 14 de setembro, ata o vindeiro día 20 de setembro. Para formalizar a matrícula deberase acudir á Casa da Cultura do Milladoiro ou ao Pazo da Peregrina en Bertamiráns en horario de 9:00 h. a 14:00 horas. Os días 14 e 15 de setembro tamén se atenderán as inscricións en horario de tarde, das 16:00 h. ás 18:00 horas.

Neste segundo prazo de inscrición, se hai máis solicitudes que prazas, farase un sorteo público e nunca se adxudicarán por orde de chegada. O sorteo público realizarase o xoves 22 de setembro, ás 12:00 horas, no salón de plenos do Concello de Ames. As listaxes definitivas de admitidos/as publicaranse o venres 23 na web do concello e nos taboleiros da Casa da Cultura do Milladoiro e do Pazo da Peregrina de Bertamiráns.

Como nos anos anteriores, para matricularse nas escolas deportivas e obradoiros culturais é imprescindible estar empadroado/a no Concello de Ames. Ademais, cada alumno/a só poderá inscribirse en dúas escolas deportivas e dous obradoiros culturais como máximo, sempre que non coincidan horarios. As clases, segundo o previsto, arrancarán a semana do luns 3 de outubro e finalizarán o 31 de maio de 2012.

Forma de pagamento

Á hora de inscribirse é necesario achegar os datos persoais do inscrito/a, e, no caso dos menores de idade, tamén do titor ou titora. Unha vez que se obteña praza na actividade, haberá que realizar o ingreso do importe total da cota que custa a actividade e entregar o xustificante de pagamento nos locais de inscrición ou envialo por correo electrónico dentro dos prazos estipulados. As persoas que se inscriban durante o segundo prazo deben de entregar o xustificante de pagamento entre do 26 ao 29 de setembro, unha vez que obteñan praza no sorteo público.

Ademais, para incrementar a participación, o Concello de Ames ofrece descontos nos prezos dalgunhas actividades polo segundo e o terceiro membro menor de 18 anos que se matricule. Para obter máis información sobre a relación de prazas libres nas que te podes inscribir podes premer na ligazón que está na marxe dereita baixo o epígrafe de "descargas".