O polideportivo La Casilla de Bilbao acolleu do 30 de maio ao 1 de xuño o XXVII Campionato de España júnior e sénior de Patinaxe Artística. No evento, a patinadora amesá Nadia Iglesias de Salvador, acadou a prata na categoría feminina sénior cunha puntuación de 122,70 puntos. O primeiro posto foi para a patinadora Carla Escrich, con 150,28 puntos, mentres que o bronce quedou nas mans de Nuria Gas, con 102,08 puntos.

No tocante á categoría senior masculina, o primeiro posto foi para Pere Marsinyach, que acadou unha puntuación de 223,93 puntos, seguido por Llorenç Álvarez con 192,07 puntos e Sergio Canales con 188,35 puntos. Por outra banda, na categoría junior feminina  Lidia Pujol acadou a medalla de ouro con 92,89 puntos, a prata foi para Nonaya Cuervo con 89,56 puntos e o bronce para Anna Castelltort con 88,04 puntos. Pau García proclamouse gañador na masculina con 187,36 puntos, seguido por Iván Pérez con 167,58 e Álex Medina con 122,80 puntos.

Unha traxectoria marcada polos éxitos
Nadia Iglesias conta cunha longa lista de éxitos acadados nos últimos anos, entre os que se encontra o seu cuarto posto no Mundial júnior de patinaxe artístico celebrado en outubro de 2018 en Francia, a medalla de prata no campionato europeo disputado en setembro nas Illas Azores, a revalidación do título de campioa de España en xuño do pasado ano, a medalla de ouro conseguida no campionato de Europa de 2017 ou o terceiro posto no mundial júnior disputado en Nanjing (China), no que competiu como campioa do campionato europeo. Neste momento, a patinadora atopase na provincia de Tarragona como membro do Reus Deportiu.