- Tematica
Este xoves, 21 de agosto, celébrase unha nova sesión dos Serán de Ames que estará protagonizada por As Armadanzas. Montse Rivera e Mercedes Prieto ofrecerán o espectáculo “Do Courel ao Condado” no que se xunta música e teatro. O espectáculo dirixido ao público familiar desenvolverase detrás do Local Social de Bugallido ás 20.00 horas. A programación dos Seráns de Ames pecharase o vindeiro xoves, 28 de agosto, en Tapia, cos Xogos de Miudiño e unha actuación musical a cargo de Mary Iglesias. Estas actividades son de acceso libre e gratuíto.
Durante os xoves de xullo e agosto os Seráns de Ames ofreceron e ofrecen propostas culturais en diferentes parroquias do concello para todos os públicos. Este xoves, 21 de agosto, ás 20.00 horas en Bugallido, é a quenda do programa Apego, co espectáculo das Armadanzas, que representarán o espectáculo “Do Courel ao Condado”.
Unha actividade para público familiar que xunta teatro e música. Nela, dúas das integrantes de Leilía, Montse Rivera e Mercedes Prieto traerannos cantigas, bailes e xogos tradicionais recollidos por todo o país para gozarmos do solpor mentres cantamos e bailamos en familia. Todas e todos os asistentes aprenderemos un pequeno repertorio de cantigas que perdurará na nosa memoria para cando o precisemos.
Neste espectáculo Matilde é unha moza do Courel e Xan un mozo do Condado, eles serán o fío que nos leve por distintos bailes, baseados na tradición pero actualizados e teatralizados. As persoas asistentes vanse divertir bailando e cantando pezas do noso repertorio tradicional.
Os temas que forman parte desta proposta recolléronse de persoas de idade en diferentes lugares de Galicia. Eran as cantigas, os bailes e os xogos que se foran transmitindo oralmente de xeración e xeración e cos que se divertían facendo máis levadeira a vida cotiá. Ao mesmo tempo, coñeceremos diferentes variantes dialectais da lingua e darémoslle continuidade ao noso patrimonio cultural.
Será á fresca, na carballeira que está detrás do local social de Bugallido. Para participar non é preciso inscrición previa. As persoas que acudan en coche poden aparcar no campo da festa. Estas actividades son de acceso libre e gratuíto.
A programación dos Seráns de Ames pecharase o vindeiro xoves, 28 de agosto, na praia fluvial de Tapia, a partir das 17.30 horas, cos Xogos de Miudiño e cun concerto da amesá Mary Iglesias, que comezará arredor das 19.30 horas.
Novas relacionadas:
El Correo Gallego: "Seráns de Ames en Bugallido con 'Do Courel ao Condado'"
Diario de Santiago: "Montse Rivera e Mercedes Prieto protagonizan unha nova sesión dos Seráns de Ames en Bugallido"
