Entre elas, destacan a creación dun sistema de transporte municipal e a mellora do transporte metropolitano da Xunta de Galicia, actividades culturais e obradoiros de temáticas variadas, mellora de locais sociais e instalacións deportivas e a ampliación do Plan de saúde mental municipal posto en marcha este mandato.

A concelleira de Mocidade, Beatriz Martínez, agradeceu a gran participación que houbo neste primeiro Consello e prometeu avaliar todas as propostas recibidas. “Queremos que nos esixades melloras e nos demandedes novas actividades e programas, non ten sentido programa sen contar coa vosa opinión e participación.”

Dito consello está composto por un representante do Club xuvenil de Ames; un representante do Club xuvenil de diversidade de Ames; un representante do local de ensaio A Factoría; e dous representantes de entre 18 e 30 anos de entidades, asociacións e colectivos relacionados coa mocidade, e catro representantes que cursan ESO, FP ou bacharelato.

A esta xuntanza tamén acudiron a concelleira do PSdeG-PSOE, Susana Señorís, o concelleiro do Partido Popular, Pablo Beiroa, e a concelleira do BNG, Rosalía Seijas. Ademais, desculpou a súa ausencia a concelleira de Espazo Común, Luísa Feijóo.

Demandas da mocidade
Nesta xuntanza, a mocidade amesá tivo a oportunidade de facer chegar ao Consello as súas principais demandas e preocupacións. En xeral, non foron outras que máis actividades e espazos: un local de reunión a cuberto durante as fins de semana en Bertamiráns, festas para menores de idade, obradoiros xuvenís, espazos para a mocidade con diversidade funcional e visitas culturais. 

Tamén se tratou unha cuestión importante como é a do transporte. Os mozos e mozas reclamaron unha mellora das comunicacións entre O Milladoiro e Bertamiráns, así como unha maior frecuencia entre os dous núcleos e entre o rural durante as fins de semana. Propostas que foron tomadas en conta e serán estudadas. 

Ademais, houbo espazo para tratar as inquedanzas sobre o mantemento e necesidade de mellora de certos equipamentos, como as cubertas dos pavillóns polideportivos do Milladoiro e Bertamiráns, a zona de acceso peonil ao IES do Milladoiro (Paseo da Igualdade), o edificio do IES de Ames ou o local social de Biduído de Arriba. 

Por último, tamén houbo momento para solicitar información en canto ao programa de saúde mental nos IES e no Pazo da Peregrina e demandar o apoio aos grupos de música locais e o fomento da música en directo en Ames.  

O Concello recolleu todas e cada unha das propostas co fin de estudalas e poder desenvolvelas dende o departamento de Xuventude, ou ben trasladalas ao departamento municipal correspondente. Ademais, animouse a todos os membros do Consello a ter unha comunicación fluída e constante máis alá das reunións semestrais. 

Distrito 13 17 
Neste contexto, esta semana presentouse o Club Xuvenil de Ames Distrito 13 17, un espazo deseñado por Xuventude Ames para rapaces e rapazas de 13 e 17 anos con gañas de pasalo ben, coñecer xente, crear, participar e facer cousas diferentes. Un proxecto de lecer que busca dinamizar a participación xuvenil no concello. 

As actividades darán comezo no mes de febreiro e haberá programación cada 15 días durante todo o ano, agás nos meses de verán (xullo e agosto), tanto en Bertamiráns (Pazo da Peregrina) coma no Milladoiro (anexo do pavillón polideportivo). As actividades comezan o venres, 6 de febreiro, no Pazo da Peregrina, en Bertamiráns, en horario de 19.00 a 21.00 horas, coa iniciativa Creando Rede. Ademais, o sábado 21 de febreiro, nese mesmo horario de 19.00 a 21.00 horas, impartirase a actividade Consolidando, no anexo do pavillón do Milladoiro.