Este luns 30 de decembro, ás 18:00 horas, o grupo Mamá Cabra representa o espectáculo Bicos de música na Casa da Cultura de Bertamiráns. Bicos de música é o último traballo do grupo Mamá Cabra. Trátase do terceiro traballo coa Editorial Galaxia despois de Ola, ola, la! O estilo habitual do grupo, con letras festivas e coreografías que acompañan os temas mantense neste proxecto musical. Este concerto enmárcase dentro da programación cultural do Nadal 2013.

Mamá Cabra é un grupo de música infantil que mestura poesía, pezas do folclore e temas propios, cun enfoque lúdico, participativo e didáctico. Este grupo de música infantil está formado por sete músicos; batería, percusión tradicional, frautas e gaita, baixo eléctrico, acordeón, guitarra eléctrica e voz. Para facer o seu repertorio baséanse en poemas de Gloria Sánchez, Ana María Fernández, Concha Blanco, Antonio García Teijeiro, etc., aínda que tamén teñen cancións propias ou temas que adaptan do folclore galego.

Venta de entradas
As entradas poderán mercarse media hora antes do comezo da función na Casa da Cultura de Bertamiráns. O prezo das entradas é de 4 euros. Terán un 50% de desconto os menores de 12 anos, os maiores de 65 e os estudantes con carné. A venda de entradas está indo moi ben. Todos os billetes que estaban destinados á reserva de entradas xa están esgotados. As entradas reservadas terán que ser recollidas o día da función entre as 17:00 h e as 17:30 horas. Os billetes que quedan aínda sen vender poderán mercarse a partir das 17:30 horas.