[21-08-2013] As bibliopiscinas de Ames, unha iniciativa que leva a lectura e outros servizos da biblioteca municipal, como os xogos, xoguetes ou actividades, aos lugares de ocio de todo o municipio, rexistraron durante o mes de agosto un total de 5.313 usuarios/as. O 80% do total dos/as usuarios/as foron nenos e nenas, que empregaron este servizo nas piscinas descubertas do Milladoiro e Bertamiráns, e na área recreativa de Tapia. O concelleiro de Educación, Bernardo Moar, visitou a bibliopiscina situada no Milladoiro, para comprobar o éxito desta iniciativa.
Segundo os datos recollidos nas bibliopiscinas, un total de 3.050 persoas, tanto adultas como nenos ou nenas, empregaron durante o mes de xullo este servizo. A este total habería que engadirlle as persoas que participaron nos obradoiros e contacontos, que foron 2.263 persoas (a maioría deles nenos e nenas).
O servizo de bibliopiscinas de Ames é unha iniciativa da concellaría de Educación que, por décimo primeiro ano consecutivo, pretende achegar os seus servizos tradicionais, levando os libros, os xogos, os contos, os xoguetes e varias actividades a estas áreas de baño. Ademais, nas bibliopiscinas hai xornais, xogos de mesa e libros para os maiores. Nesta edición, o servizo é impartido por varios monitores/as da empresa amiense Vagalume, que se encargan de facer máis entretidas as tardes de piscina da época estival.
Ademais, pódese acceder aos servizos de préstamo de libros a toalla e a domicilio. Algo para o que só é preciso contar co carné das bibliopiscinas ou da piscina municipal descuberta. Todos os demais servizos son de acceso libre.
O concelleiro de Educación, Bernardo Moar, destacou “o éxito que está tendo un ano máis o servizo de bibliopiscinas, unha iniciativa coa que pretendemos que os nenos e nenas poidan asociar a lectura non só coas horas de estudo senón tamén co tempo de lecer”. O concelleiro tamén agradeceu á empresa encargada do servizo “o seu esforzo e implicación á hora de programar actividades lúdicas e motivadoras pensadas nos máis pequenos”.
Horario das bibliopiscinas
En Bertamiráns e no Milladoiro o horario é de luns a venres de 16:00 h a 20:00 horas. As fins de semana e os festivos están pechadas. En Tapia o horario é o mesmo, dende as 16:00 h ata as 20:00 horas, pero de martes a domingo (os luns están pechadas por descanso do persoal). Ademais, está aberto os días festivos.
Este servizo é impartido por varios monitores/as da empresa amiense Vagalume, que se encargan de facer máis entretidas as tardes de piscina da época estival. Cómpre salientar que este servizo é impartido por persoal amiense.
Contido relacionado
La Voz de Galicia: "Las bibliopiscinas de Ames tuvieron más de cinco mil usuarios en julio"
El Correo Gallego: "Máis de 5.300 persoas empregaron o servizo de bibliopiscinas do Concello de Ames durante o mes de xullo"