[28-03-2016] Durante as vacacións de Semana Santa máis de 300 rapaces, todos menores de 11 anos, desprazáronse ata o concello de Ames, ás instalacións do campo municipal de Bertamiráns, para participar na V Torneo de Fútbol Base Ames Cup. Uns 21 equipos na categoría pre-benxamín e 24 na de benxamín participaron neste torneo de fútbol base, que se desenvolveu entre o xoves 24 e o venres 25 de marzo. Os rapaces do equipo A do Bertamiráns FC alzáronse coa copa na categoría benxamín, mentres que os xogadores da Escola Estradense FB A facían o propio na categoría pre-benxamín. Ademais, entregáronse trofeos aos mellores porteiros, os máximos goleadores, xogadores destacados e aos adestradores en cada unha das categorías.
Categoría pre-benxamín
O venres 25 foron os xogadores da categoría pre-benxamín os que ocuparon o terreo de xogo. Pola mañá, do mesmo modo que fixeran o día anterior os seus compañeiros maiores, tiveron lugar os encontros da fase de grupo. Á tarde xogáronse os partidos de eliminatoria. O Atlético Fátima, de Santiago de Compostela, e a Escola Estradense FB A disputaron a final da copa, mentres que o Amio SD e a SD Negreira xogaron polo terceiro e o cuarto posto. Os rapaces do Atlético Fátima proclamáronse campións tralo remate dun partido que se resolveu trala quenda de penaltis, e no que o porteiro dos composteláns salvou ao seu equipo tras parar o segundo disparo. Os benxamíns da SD Negreira clasificáronse terceiros tras vencer ao Amio SD por 4 goles a 1.
A esta xornada, na que se celebrou tamén a clausura da V Ames Cup, acudiron para entregar os premios o concelleiro de Urbanismo, Obras Públicas e Servizos Básicos, Blas García, o presidente do Bertamiráns FC, Rafael Budiño, e o directivo de fútbol base do Bertamiráns FC, Abelardo Ríos.
Desta volta foi Daniel Pereira, do Caldas CF, o elixido como o mellor porteiro do torneo, o estradense Jorge Picáns, da Escola Estradense FB A, recibiu o premio de máximo goleador, Daniel Couselo, do Atlético Fátima, foi galardoado como mellor xogador, e Iago Vidal foi elixido mellor adestrador, pola seu traballo e esforzo cos rapaces do Atlético Fátima de Santiago de Compostela.
Na mañá do xoves 24 os rapaces da categoría benxamín foron os encargados de abrir a V Ames Cup. Pola mañá tiveron lugar os encontros da fase de grupo, seguida xa pola tarde dos partidos da fase eliminatoria. Os xogadores locais do equipo A do Bertamiráns FC venceron aos do Racing San Lourenzo por 3 goles a 1, facéndose así coa copa. A disputa polo terceiro e o cuarto posto resolveuse coa vitoria dos rapaces do EF Boqueixón, cuxo gol non foron capaces de empatar os xogadores do equipo B do Bertamiráns FC.
Á entrega de premios, tanto aos equipos gañadores como aos xogadores e adestradores destacados, acudiron o concelleiro de Urbanismo, Obras Públicas e Servizos Básicos, Blas García, a concelleira de Xuventude e Transparencia, Silvia Dapena, a concelleira de Medio Ambiente e Desenvolvemento Sostible, Catuxa García, o concelleiro do grupo municipal de Ames Novo, Roberto Amarelle, o concelleiro do grupo municipal popular, Roberto Martínez, o presidente do Bertamiráns FC, Rafael Budiño, e María Villar, nai de Adrián Amboage.
Matías Fuentes, do Racing San Lorenzo A, recibiu o premio ao mellor porteiro, Pablo Vizcaya, do Bertamiráns FC A, recibiu o galardón de máximo goleador, e Juán Ferreiro, tamén do equipo A local, foi elixido como o mellor xogador. Ademais, Adrián Amboage recibiu o premio especial, e Juán Ordóñez obtivo o galardón de mellor adestrador pola súa labor cos rapaces do Victoria CF.
