Os actos relixiosos xa comezaron o xoves 15 de setembro coas misas da novena na honra da Virxe da Mercé celebradas na igrexa de Lapido ás sete e media da tarde. Este venres, será o último día da novena e, tamén, o comezo da verbena. Resulta importante destacar que haberá servizo de bar e aparcadoiro gratuíto.

A música da orquestra Capitol amenizará a xornada do venres onde os veciños e veciñas de Lapido non poderán parar de mover o esqueleto. Pero, Capitol non será a única atracción xa que o espectáculo do DJ Carlos Ferro suporá unha inxección de alegría grazas as súas fantásticas misturas. Ata altas horas da madrugada os e as asistentes gozarán dunha verbena espectacular que lles deixará un bo sabor de boca.

Porén, a festa non remata aquí xa que o sábado, 24 de setembro, haberá máis baile e diversión para todos os públicos. Xa pola mañá, terá lugar ás 13:00 horas, a misa solemne na honra da Virxe da Mercé e, posteriormente, as persoas que se acheguen ao lugar poderán gozar do aperitivo e da sesión vermú a cargo da orquestra Juan Mallo.

A comisión non se esquece dos rapaces e rapazas e, por iso, o sábado en horario de 17:00 h. a 19:00 horas, os cativos e cativas terán a súa completa disposición uns inchables nos que poderán saltar e xogar ata quedaren esgotados. Como fin de festa, o sábado as orquestras Mallo e Troco darán o último compás obrigando aos asistentes a dar un paso adiante para rematar por todo o alto esta festividade.

O venres e o sábado, a festa está en Lapido.