As actuacións previstas na Travesía do Porto comprenden un traballo previo, que abrangue o varrido e a reparación das fochancas existentes na superficie, e a posterior execución de dobre tratamento asfáltico. Posteriormente, procederase ao pintado da sinalización horizontal e do trazado de vía.

O obxectivo destes traballos é mellorar o estado e a seguridade dunha das avenidas máis importantes do Milladoiro, e que conta nos arredores cun novo centro comercial e cun centro educativo. As obras na Travesía do Porto permitirán mellorar a seguridade dos vehículos e peóns que cada día transitan por esta zona.

Dous convenios coa Deputación

Este trámite coincide coa sinatura nos últimos días de dous convenios coa Deputación da Coruña dotados con 271.050 e 110.693 euros, respectivamente, en virtude dos que, entre outros traballos, se acometerá esta mellora e acondicionamento da Travesía do Porto e a finalización da pavimentación de Lapido. Ademais, levarase a cabo o acondicionamento da Biblioteca Municipal do Milladoiro, "cumprindo así o compromiso do Goberno de dotar ao Milladoiro dunha biblioteca apta para o estudo e a lectura e en mellores condicións que a actual".

O primeiro destes convenios, que contará cun investimento provincial de 271.050,15 euros, permitirá a posta en marcha de diferentes obras que teñen que ver coa mellora de estradas, canalización de pluviais e seguridade viaria en varios puntos do Concello. Deste xeito, levarase a cabo a reparación do firme asfáltico e o pintado da Travesía do Porto no Milladoiro, uns traballos aos que se destinarán 67.933 euros e que permitirán aumentar a seguridade desta avenida para vehículos e peóns.

Ademais, en virtude deste acordo poderanse acometer os traballos de minoración da afección das avenidas do Rego dos Pasos en Bertamiráns, e a segunda fase da pavimentación interior en Lapido. O proxecto de Lapido, no que se investirán 79.212 euros, é unha obra que o anterior Goberno municipal deixou sen concluír por problemas de financiamento e que agora se rematará. Sobre estes traballos, o rexedor amiense destaca que “o actual Executivo cumpre con este convenio o compromiso de acadar unha achega económica da Deputación para a súa finalización, tal e como me comprometín cos veciños”.

O convenio coa Deputación da Coruña tamén facilitará o acondicionamento e mellora da rúa Seidón do Milladoiro, ou a canalización de pluviais e mellora de seguridade viaria no lugar de Ventín-Biduído. Esta última obra mellorará a seguridade dos peóns que circulen por esta zona e, favorecerá especialmente, á comunidade escolar de Ventín. Con este convenio coa Deputación, o Concello tamén acometerá a mellora das condicións de seguridade peonil en Biduído de Arriba, na zona do colexio Alca, e no Milladoiro. O obxectivo é garantir a seguridade dos peóns que transitan por estas vías.

O segundo convenio coa Deputación da Coruña, dotado cunha achega provincial de 110.693,24 euros, servirá para acometer as obras de ampliación da Biblioteca Municipal do Milladoiro. O rexedor amiense subliña que “se cumpre así o compromiso do Goberno de dotar o Milladoiro dunha biblioteca axeitada para o estudio e a lectura e en mellores condicións que a actual”.

Contido relacionado

El Correo Gallego: "Contratan las obras para el arreglo de la Travesía do Porto"
La Voz de Galicia: "Arranca en Ames el proyecto de mejora viaria en el tramo de Travesía do Porto"