A Oficina de Voluntariado de Ames oferta numerosos cursos e actividades para o período 2011-2012, entre outros o programa deportivo Sanauga. Esta actividade, dependente da Concellería de Deportes, Tempo Libre e Voluntariado, está dirixida a persoas da terceira idade e con discapacidade. Sanauga, coa finalidade de mellorar a mobilidade e o benestar físico dos asistentes, centrará o seu curso na ximnasia acuática. Esta actividade consiste na realización na auga de exercicios que habitualmente se fan en terra. O curso vai encamiñado á mellora física das persoas participantes e o seu obxectivo principal é mitigar enfermidades como a artrite e as dores derivadas de diversas doenzas musculares e óseas.

Desenvólvese na piscina municipal A Telleira, situada en Bertamiráns, e poden participar os veciños e veciñas amienses que se atopen por riba dos 60 anos ou que teñan algunha discapacidade. Para poder participar nesta actividade non é preciso saber nadar. O que se pretende con este tipo de exercicios é unha aproximación ao medio acuático desde a motricidade cotiá das persoas e sen o requirimento de saber nadar. Realízanse na auga movementos habituais cos que a persoa maior está familiarizada, como pode ser andar, mover de segmentos corporais, empurrar materiais...

As inscricións poden realizarse na Casa da Cultura do Milladoiro, os luns e os mércores das 9.00 h ás 12.00 h, e na Casa da Cultura de Bertamiráns, en horario de 9.00 h a 14.00 horas, de luns a venres. Para máis información, pódese chamar á Casa da Cultura de Bertamiráns ao 981 883 703 ou ben ao teléfono 981 535 940 da Casa da Cultura do Milladoiro. Tamén se poden aclarar dúbidas poñéndose en en contacto coa Oficina de Voluntariado de Ames a través do correo electrónico voluntariado@concellodeames.org ou ben informarse a través da conta de facebook da OVA.