- Tematica
A gala de entrega de premios do IX Concurso Radiofónico de Teatro Lido de Ames “Desata a Lingua” levarase a cabo este xoves, 19 de decembro, ás 20.00 horas, no auditorio da Casa da Cultura de Bertamiráns. Despois da emisión das pezas dos 21 grupos participantes en Ames Radio, e de que a audiencia decidira que grupo obterá o premio do público, a través dos seus votos, nesta gala daranse a coñecer aos gañadores do concurso, á que asistirá todo o alumnado participante. Ademais do premio do público, haberá premio para o mellor guión orixinal e para a mellor interpretación.
Esta nova edición do concurso radiofónico, organizada polos departamentos de Mocidade, Normalización Lingüística e Comunicación do Concello de Ames, contou coa participación de 21 grupos; 7 do IES do Milladoiro e 14 do IES de Ames, en Bertamiráns. En total, 69 rapazas e rapaces de 1º, 2º, 3º e 4º da ESO participaron nunha actividade que pretende dinamizar dun xeito lúdico e a través da creatividade o uso oral e escrito do galego entre a mocidade amesá. Asemade, fomenta o gusto polo teatro e o achegamento á radio municipal.
Nesta edición participaron sete grupos do IES do Milladoiro: A rebelión, Os Cómicos, Amesá, Os Ventinianos, Ponis Salvaxes, Sacarina e M.A.C; e 14 do IES de Ames (Bertamiráns): Pandilla de empanadilla, Patos sen zapatos, S.E.N.A, RVR, Plumas douradas, XVG, As de primeiro, Raíces de amizade, Sardiñas armadas, As catro fantásticas, As esquíos de Ames, Discípulos de Xosé Ramón, ZRI e A fume de carozo.
As pezas, emitíronse do 2 ao 5 de decembro na emisora municipal Ames Radio (107.2 FM), en horario de 13.30 a 21.30 horas, ademais de estaren dispoñibles na sección de avisos da web municipal. Posteriormente, abriuse o período de votación, do 3 ao 8 de decembro, para decidir que obra obtería o premio do público. E xa por último, despois do reconto de votos e da reunión do xurado, este xoves daranse a coñecer na gala quen son os galardoados.
Como en edicións anteriores, haberá tres premios de 200 euros para os grupos gañadores: o premio ao mellor guión orixinal, o premio á mellor interpretación e o premio do público, decidido pola audiencia de Ames Radio entre as pezas emitidas.
