O auditorio da Casa da Cultura do Milladoiro acolle este venres, 3 de xaneiro, o espectáculo O Crebanoces, que está promovido pola Secretaria Xeral de Política Lingüística. Trátase dun espectáculo para monicreques inspirado no conto de Hoffmann e dirixido ao público familiar. No espectáculo emprégase a música que creou Tchaikowsky e está deseñado para poder ser interpretada por bandas de música popular.

O espectáculo está producido para monicreques de mesa con manipulación mixta (siluetas, bocóns, obxectos e outros). Está dirixido ao público familiar, de maneira que o goce será maior na medida en que acudan os nenos e nenas cos seus pais, nais, avós, etc. No espectáculo soa completa a suite do Crebanoces de Tchaikowsky. Durante a execución da música hai pantomimas dos bonecos, e entre unha e outra parte musical hai escenas con partes faladas dos bonecos e narración cara o público.

A historia deste espectáculo conta que na noite de Nadal o padriño regálalle á pequena Clara un crebanoces con forma de boneco. De tanto partir noces, o boneco acaba rompendo, e Clara desgústase moito. Para consolala o padriño contaralle a historia do boneco Crebanoces, xa que o Crebanoces na realidade é un valente personaxe que loitou co seu exército de xoguetes contra a raíña dos ratos.

O Crebanoces forma parte da completa programación deseñada polo Concello de Ames para o Nadal 2013, na que se programaron preto de 30 actividades pensadas para todos os públicos. A entrada para ver este espectáculo é totalmente gratuíta. Poderase acceder ao auditorio da Casa da Cultura do Milladoiro ata completar aforo.