[14-06-2013] Entre os días 8 e 15 de xuño estase disputando o IV Torneo de Tenis e o II Torneo de Minitenis nos pavillóns polideportivos e nas pistas exteriores do Milladoiro e de Bertamiráns. Estes torneos enmárcanse dentro do programa das escolas deportivas municipais. O Concello pretende, a través deste programa, potenciar hábitos de vida saudables por medio do deporte e difundir valores tan importantes coma o respecto, o compañeirismo e a tolerancia. Nestes torneos de tenis están participando 90 persoas entre nenos/as e adultos. A entrega de premios terá lugar este sábado 15 de xuño, ás 13:00 horas, no pavillón de Bertamiráns.
O tenis é unha das actividades con maior éxito dentro das escolas deportivas municipais. Para consolidar esta tendencia, entre os días 8 e 15 de xuño, estase desenvolvendo o IV Torneo de Tenis e o II Torneo de Minitenis das escolas deportivas municipais. Tralo éxito das edicións anteriores, a través desta iniciativa inténtase facer este deporte máis atractivo tanto para nenos coma para adultos.
Nestes torneos están participando arredor de 90 nenos/as e adultos que compiten en sete categorías diferentes dependendo da idade e do sexo. O torneo de minitenis conta con dúas categorías (nenos/as de 6 a 8 anos masculino e feminino - rapaces e rapazas de 9 a 12 anos masculino e feminino), mentres que no Torneo de Tenis establecéronse 5 categorías dependo da idade e do sexo.
O torneo comezou o sábado 8 de xuño e desenvolveuse ao longo de toda a mañá. Na primeira xornada disputouse a primeira ronda de ambos os dous torneos. Ao longo desta semana xogouse a segunda ronda e as semifinais, quedando as finais para este sábado 15 de xuño. Polo tanto as finais disputaranse este sábado, entre as 10:00 h a 13:00 horas, nos pavillóns polideportivos e nas pistas exteriores do Milladoiro e de Bertamiráns. A entrega de premios terá lugar este sábado 15 de xuño, ás 13:00 horas, no pavillón de Bertamiráns.