O pavillón polideportivo de Bertamiráns será a sede, un ano máis, do Torneo de Nadal de Karate Concello de Ames. Nesta ocasión o público asistente poderá gozar da exhibición da modalidade de kata individual e kumite xuvenil. Arredor de 220 deportistas daranse cita neste torneo e poderán amosar todos os seus coñecementos na materia para lograr ser proclamados como os mellores.

Neste torneo daranse cita 12 clubs da comarca. Os clubs que participan nesta competición son o Bispo Guerra Campos, BUSHI-KAI Santiago, AVALON- KAI, a Escola de Karate Akai-Ryu, San Francisco de Teo, Club Karate Touro, Club Karate Boiro, Club Cluny, Club Lamas de Abade, Club Ramón Cabanillas, Club Karate Lavacolla e o Club Karate Vedra.

Nenos e nenas compartirán o seu nivel e destreza na disciplina pero cada un baixo a súa categoría correspondente. Os nenos e nenas de 8 e 9 anos en alevín; os de 10 e 11 anos estarán no grupo infantil; os de 12 e 13 anos formarán o grupo xuvenil. Haberá competición tanto na categoría feminina coma na masculina. Na modalidade de kumite só participarán os rapaces e rapazas da categoría xuvenil (12 e 13 anos).

Na loita dous contrincantes executarán as súas técnicas un despois do outro dependendo da cor do seu cinto. O gañador da competición deberá ter a meirande parte das bandeiras erguidas ao seu favor. Cinco xuíces serán os encargados de avaliar cada unha destas rutinas tanto na execución como na dirección, a forza e o equilibrio dos participantes.

A competición celebrarase nas modalidades da kata e kumite. Na categoría de kata os competidores non chegan a establecer ningún tipo de contacto físico. Os deportistas marcan movementos de defensa e de ataque como se estiveran nun combate imaxinario. En cambio, na modalidade de kumite realízase unha loita na cal as técnicas practicadas teoricamente son aplicadas nun enfrontamento cun opoñente real.