Este sábado, 17 de decembro, subirán ao escenario do auditorio municipal da Casa da Cultura do Milladoiro tres corais, para celebrar o xa tradicional concerto de corais de Nadal. A coral Lembranzas de Santa Cruz de Oleiros abrirá o evento. De seguido, actuará o grupo Arosa Bay de Vilagarcía. Por último, pechará o acto a coral polifónica Antonio Santomil de Bugallido. Este evento comezará ás 20:00 horas. A entrada será de balde ata completar o aforo.

A Coral Lembranzas de Santa Cruz de Oleiros naceu no último trimestre de 1994 e dende entón diríxea Salvador Gascón. Na actualidade está formada por 39 voces mixtas. Dende o seu nacemento esta agrupación participou en multitude de concertos de todo tipo en toda a xeografía do Estado, así como tamén en Portugal e Italia. Asemade, ten gravados dous CDs e colaborou coa Televisión de Galicia en diversos programa e na serie de ficción Padre Casares. No seu repertorio figuran unhas cen cancións: habaneiras, canción moderna, folclore galego e de toda a xeografía do Estado, así como música sacra.

O grupo Arosa Bay é unha agrupación musical, fundamentada no acordeón e nas voces. O seu repertorio está baseado en pezas melódicas cantadas e acompañadas polo acordeón e a corda. Así interpretan dende temas populares ata os intemporais boleros, vals, habaneras, canción mexicana, guaranías, fados, cumbias e canción portuguesa. Tamén teñen temas de colleita propia (versión propia de Lela, as habaneras, Arousa, que foi rescatada do canto popular da bisbarra e que evoca ás marabillosas terras da ría de Arousa, e Un canto a miña rula).

O director do grupo é Alfonso Galbán Rico, quen despois dunha longa traxectoria de músico profesional e despois de 26 anos de director da escola de música de Vilagarcía de Arousa, fundou e formou este grupo. Todos os temas que interpretan están adaptados con mestría as tesituras de voces e instrumentos polo propio director, polo que as interpretacións das mesmas gozan dunha grande acollida entre o público. Esta agrupación está composta por 12 músicos e un técnico de son.

A coral polifónica de Bugallido creouse no ano 1971 en Bugallido (Ames), sendo o seu primeiro director Antonio Santomil, o que daquela era cura párroco. Baixo a súa batuta a coral realizou actuacións en distintos puntos de Galicia e Portugal. Trala morte prematura do seu director e principal impulsor a coral quedou inactiva. No ano 1991 púxose en marcha de novo, grazas á labor de persoas que participaron nela con anterioridade. Creouse así a Asociación Cultural Antonio Santomil, na que se enmarca a coral polifónica. Dende entón esta agrupación participa, xunto con outras corais, en certames e festivais ao longo de toda a xeografía galega.