Pestanas principais

Este martes, 15 de outubro, celébrase unha Xunta de Goberno Local aberta ao público para elixir os membros das mesas electorais para as elección xerais do 10 de novembro

Luns, 14 de outubro de 2019

Este martes, 15 de outubro, celebrarase unha sesión extraordinaria da Xunta de Goberno Local, para realizar o sorteo, de xeito aleatorio, das persoas que ocuparán as 35 mesas electorais de Ames nas próximas eleccións ao Congreso dos Deputados e ao Senado, eleccións que terán lugar o domingo, 10 de novembro. Dita Xunta de Goberno Local, que se realizará no salón de plenos da Casa do Concello, será aberta a toda a veciñanza que queira acudir. Un total de 24.041 persoas poderán votar en Ames. O persoal do Concello será o encargado de notificarlle a cada persoa que saía elixida que forma parte dalgunha das mesas electorais.

Máis de 24.000 persoas están chamadas ás urnas en Ames nas vindeiras eleccións ao Congreso dos Deputados e ao Senado. Este martes, ás 10:00 horas, celebrarase unha sesión extraordinaria da Xunta de Goberno Local para elixir ás persoas que ocuparán as 35 mesas electorais do Concello de Ames nas próximas eleccións xerais, que se celebrarán o día 10 de novembro. O censo electoral amesán incrementouse en 34 persoas respecto das anteriores eleccións xerais celebradas o 28 de abril de 2019.

Este proceso levarase a cabo de xeito aleatorio e para iso empregarase un sistema informático no que se meten todas as persoas censadas con dereito a voto que hai no municipio amesán e, de xeito automático, procederase ao sorteo para determinar os integrantes das mesas electorais. Dita Xunta de Goberno Local, que se realizará no salón de plenos da Casa do Concello, será aberta a toda a veciñanza que queira acudir.

Esta é a cuarta vez que dito sorteo se realiza en Xunta de Goberno Local, despois que se aprobase en Pleno unha proposición para delegar neste órgano o sorteo dos membros das mesas electorais Esta modificación realizouse tras unha proposta que lle fixo o goberno aos distintos voceiros e voceiras dos grupos políticos municipais da oposición. Deste xeito, elimínase a celebración dun pleno extraordinario de curta duración para elixir os membros de ditas mesas, co conseguinte aforro de tempo e cartos para a Administración local.

 

Novas relacionadas:

Compostela 24 horas: "Hoxe celébrase unha Xunta de Goberno Local aberta ao público para elixir os membros das mesas electorais"

Imaxe da Casa do Concello