[13-02-2017] Ames acolle ao longo desta semana unha nova edición das Xornadas de comedores escolares organizadas pola Federación de ANPAS Compostela en colaboración coa Confederación de ANPAS galegas. A pedagoga Mar Romera, presidenta da Asociación Francesco Tonucci, presentará as xornadas o día 14 de febreiro, ás 20:00 horas, cunha conferencia sobre o proxecto educativo e a alimentación saudable no ensino público. O día 18 de febreiro, a partir das 10:00 horas, realizaranse diferentes encontros e mesas de debate sobre o modelo de xestión dos comedores escolares. Estas xornadas desenvolveranse no auditorio da Casa da Cultura de Bertamiráns.
Os días 14 e 18 de febreiro o Concello de Ames situarase, por primeira vez, no centro do debate sobre o modelo de xestión dos comedores escolares de Galicia. Cómpre lembrar que as primeiras xornadas sobre os comedores escolares celebráronse en maio de 2016 en Santiago de Compostela. Deste xeito, dáselle continuidade a este evento que nesta ocasión celébrase na localidade de Bertamiráns.
O concelleiro de Educación e Cultura, David Santomil, explica que “a través desta iniciativa pretendeuse crear debate sobre o modelo de xestión dos comedores escolares de Galicia. As Xornadas sobre comedores escolares están organizadas pola Confederación de ANPAS galegas e a Federación de ANPAS da comarca de Compostela e contan coa colaboración do Concello de Ames. Na primeira edición destas xornadas participamos nunha mesa redonda para explicar o funcionamento da Rede municipal de comedores do Concello de Ames, que son un referente na calidade e na xestión directa a nivel estatal”.
As entidades organizadoras coinciden na importancia de realizar en Ames estas xornadas. O martes 14 de febreiro, ás 20:00 horas, a pedagoga Mar Romera presentará as xornadas cunha conferencia sobre o proxecto educativo e a alimentación saudable nas escolas.
Xestión dos comedores escolares
O sábado 18 de febreiro, no mesmo auditorio, e dende as 10:00 horas realizaranse diferentes mesas de debate sobre o modelo de xestión dos comedores escolares a través de empresas de catering, dos concellos, da Xunta de Galicia e das ANPAS, así como das iniciativas máis destacadas neste ámbito. Aproveitarase esta sesión matinal para facer públicos os resultados dun estudio da enquisa feito entre as familias compostelás realizada pola Federación de ANPAS Compostela, a través da distribución de 2.760 cuestionarios nos que preguntaron ás familias polo modelo de xestión do servizo de comedores que prefiren nos centros públicos de Santiago de Compostela.
Proxecto educativo
Xa pola tarde, o primeiro bloque centrarase nos produtos ecolóxicos e de proximidade, onde están convidadas empresas e proxectos que desenvolven ditas actividades. De seguido, diferentes empresas concesionarias do funcionamento dos programas de conciliación de Ames e o Colexio de Educadoras e Educadores sociais de Galicia abordarán o proxecto educativo dos comedores escolares, dando a coñecer as primeiras polo miúdo o traballo que se está a realizar nos centros públicos de Ames. Finalmente pechárase estas xornadas co módulo Dieta Atlántica e Deporte.
Estas xornadas están deseñadas para todos os públicos, desde usuarios/as de comedores escolares, docentes, persoal dos comedores escolares, comunidade educativa e ANPAS en xeral, e tamén para diferentes empresas provedoras locais e hostalería. Para obter máis información, obter o programa e inscribirse hai que enviar un correo electrónico ao enderezo anpascompostela@gmail.com ou acceder á paxina web: www.anpasgalegas.org