O departamento de Xuventude organiza, un ano máis, o programa de reforzo educativo para o alumnado de 1º e 2º da ESO dos centros de secundaria de Ames. A iniciativa, que xa leva máis dunha década en funcionamento, ten como obxectivo axudar ao alumnado no cambio e adaptación da educación primaria á secundaria, para prever así situacións relacionadas co fracaso ou o abandono escolar.

Deste xeito, entre os meses de xaneiro e xuño, os departamentos de orientación educativa dos institutos e o departamento municipal de Xuventude póñense en contacto para colaborar e poñer a disposición dos alumnos e alumnas que o necesiten esta ferramenta de apoio educativo. 

As clases comezarán este luns 19 de xaneiro, desenvolvéndose os luns e mércores na Casa da Cultura do Milladoiro e os martes e xoves na Casa da Cultura de Bertamiráns. Impartiranse un total de seis horas de clases de apoio para o alumnado de cada centro educativo, facendo así un total de doce horas á semana. Na edición deste ano poderán participar ata 48 mozos e mozas matriculados en 1º e 2º da ESO, etapa na que máis se demanda este apoio na formación educativa.

A concelleira de Mocidade, Beatriz Martínez, destacou que “o programa de reforzo educativo é un servizo municipal que funciona moi ben entre o alumnado amesán polo que volve a poñerse en marcha un ano máis. Trátase de axudar ao alumnado no cambio e adaptación da educación primaria á secundaria, para prever así situacións relacionadas co fracaso ou o abandono escolar”.

Metodoloxía do programa
Durante estas horas de reforzo, o alumnado participante está dividido tanto por cursos como por áreas formativas. A metodoloxía do programa consiste en traballar a comprensión das ideas adquiridas na clase a través da práctica do temario xa impartido. Desta forma, o alumnado reforza as posibles lagoas de coñecemento, repasando contidos concretos que xa foron explicados con anterioridade nas aulas.

Por outra banda, estas horas de clases extra facilitan a recuperación de destrezas instrumentais básicas que dificultan ou mesmo imposibilitan aos estudantes atender o desenvolvemento ordinario das clases nos institutos. Os propios departamentos de orientación dos IES de Ames e do IES do Milladoiro son os encargados de derivar aos alumnos e alumnas que, polas súas circunstancias, sexan candidatos a participar e sacar así o máximo proveito desta iniciativa. A inscrición debe entregarse nos departamentos de orientación de cada centro educativo.

Novas relacionadas

Diario de Santiago: "Este luns, 19 de xaneiro, comeza unha nova edición do programa de reforzo educativo para o alumnado dos institutos do Milladoiro e Bertamiráns"