Un ano máis o XL Milladoiro e o Concello de Ames únense por unha boa causa. Este domingo 22 de decembro, ás 19:30 horas, disputarase no pavillón polideportivo de Bertamiráns o V partido benéfico de baloncesto Concello de Ames. A entrada para asistir a este evento será gratuíta, pero todas as persoas que o desexen poderán dar un donativo de forma voluntaria. Os fondos recadados estarán destinados ás familias amienses que carecen de recursos económicos.

Neste partido o XL Milladoiro enfrontarase a un equipo de famosos que estará repleto de ex-xogadores de baloncesto como Tonecho Lorenzo, Julio Jiménez, Lolo Castro, Julio Fernández, Coque Rama, Augusto de la Concepción, Calvelo e Julio Teixeira (algúns deles son ex-xogadores do Club Amigos Baloncesto Obradoiro). Tamén está confirmada a asistencia do humorista Víctor Fábregas. O partido será arbitrado polo ex-árbitro internacional, Vicente Sanchís, e polo presidente do Club de baloncesto XL Milladoiro, Santiago Pampín.

Este ano o Club Amigos Baloncesto Obradoiro volverá a colaborar nesta iniciativa. Deste xeito, o XL Milladoiro estará adestrado por Alberto Corbacho, mentres que o equipo de famosos estará dirixido por Oriol Junyent, ambos os dous son xogadores do Rio Natura Monbus Obradoiro. Ademais, está previsto que a maior parte dos xogadores do Rio Natura Monbus Obradoiro asistan a este partido de baloncesto para apoiar este acto solidario.

I Gala de Nadal do Club de Patinaxe Artística Omega
Por outra banda, o Club Patinaxe Artística Omega organizou en colaboración co Concello de Ames, para este sábado 21 de decembro, a partir das 19:00 horas, a I Gala de Nadal de Patinaxe Artística. Este evento, que se desenvolverá no pavillón polideportivo do Milladoiro, servirá para mostrar en público todo o aprendido polos/as patinadores/as deste club durante este ano.

Contido relacionado

El Correo Gallego: "Este domingo disputarase o V partido benéfico de baloncesto Concello de Ames"