O Concurso Radiofónico de Teatro Lido pretende dinamizar dun xeito lúdico o uso oral e escrito do galego entre a mocidade amesá a través da reflexión colectiva e da creatividade. Intenta, ademais, fomentar o gusto polo teatro entre a mocidade e o achegamento á radio municipal. Estes son algúns dos obxectivos desta iniciativa posta en marcha polos departamentos de Normalización Lingüística, Mocidade e Comunicación do Concello de Ames.

Nesta edición, como novidade, optouse polo formato de monólogo, en consonancia coa programación cultural do concello. A participación pode ser individual ou en grupos de 3 persoas como máximo. Se a inscrición é grupal, o propio grupo designará o/a intérprete e indicará a función de cada unha das persoas dentro do grupo. O grupo poderá desenvolver en equipo parte do proceso, desde a escolla do tema, preparación do guión, os ensaios etc. A interpretación será sempre individual. Todas as inscricións, ben sexan individuais ou grupais, deberán ter un/unha representante (profesorado ou calquera outra persoa adulta) co fin de coordinar con ela as datas da formación e da gravación.

Os textos estarán en lingua galega e en formato de monólogo. A temática será libre, aínda que se valorará que estea relacionada con algún tema de actualidade. O texto poderá ser de creación propia ou unha adaptación/recreación dun texto de autor/a. O tempo estimado de emisión para cada un dos monólogos estará entre os 5 e os 10 minutos.

A inscrición dos participantes realizarase no IES de Ames (Bertamiráns) e no IES do Milladoiro, a través do Equipo de Dinamización Lingüística e utilizando a ficha de inscrición que se facilite. O prazo para inscribirse remata o 14 de outubro de 2014.

Xornada de formación
Todo o alumnado inscrito participará nunha xornada de formación impartida por unha persoa especialista en radio e teatro na que se achegarán claves de guionización, locución e interpretación. Esta xornada terá unha duración de tres horas e impartirase nos centros de ensino entre o 20 e o 22 de outubro.

Todos os e as participantes realizarán a gravación e a montaxe do monólogo na Radio municipal de Ames, entre o 27 e o 31 de outubro, previa cita fixada pola organización. A emisión das pezas realizarase en Ames Radio (FM 107.2) entre o 3 e o 20 de novembro nas seguintes franxas horarias: das 13.30 h ás 14.30 e das 22.00 h ás 23.00 h (de luns a venres). Os días 3 e 19 de novembro realizarase unha emisión especial pola tarde na que se poderán escoitar todas as pezas. A participación no concurso implica a autorización para estas emisións e a cesión a favor do Concello de Ames dos dereitos de comunicación pública, reprodución e distribución. A todas e todos os participantes facilitaráselles unha copia do seu monólogo.

Repartiranse 600 euros en premios
Repartiranse un total de 600 euros en tres premios dotados con 200 euros cada un. A audiencia da radio municipal escollerá entre os monólogos emitidos o que obterá o premio do público. A votación realizarase entre o 10 e o 20 de novembro (incluídos) a través do correo electrónico radioteatro@concellodeames.org ou do teléfono 981 890 452. Os/as votantes terán que identificarse e só se computará un voto por persoa.

Haberá outros dous premios: premio ao mellor guión orixinal e premio á mellor interpretación. Estes dous premios tamén estarán dotados con 200 euros cada un. A Alcaldía Concello de Ames designará un xurado que será o encargado de seleccionar todos os premios, agás o do público. Os premios entregaranse a primeira semana de decembro.

Todo o alumnado e profesorado participante recibirá como agasallo un convite para unha das funcións teatrais programadas polo Concello de Ames. Estes convites poderán intercambiarse por entradas no prazo de reserva establecido polo Concello e estarán suxeitos á dispoñibilidade de aforo.

Contido relacionado

El Correo Gallego: "Ames divulgará el gallego con un certamen de monólogos en radio"