Co remate do curso lectivo chega o período vacacional para todo o alumnado amesán, que lles permite gozar dun máis que merecido descanso ao longo do verán. Deste xeito, o Concello de Ames, a través das Concellarías de Medio Ambiente e de Mocidade, ofrece unha serie de campamentos de verán, ofertados á rapazada que estea cursando educación infantil, primaria, secundaria ou bacharelato.

Trátase dunha oferta variada, lúdica e formativa de desenvolvemento persoal, pensada para promover a súa autonomía e independencia fomentando a convivencia, a cooperación, o respecto e un xeito de vida saudable ao tempo que se achegan ao medio natural, ao deporte ou á cultura.

Neste senso, o domingo 26 de xuño as primeiras nenas e nenos, que cursaron 6º de primaria neste curso 2021-2022, estrearon o programa municipal de campamentos, viaxando á Praia de Patos, en Nigrán. Alá van permanecer ata este venres 1 de xullo, un tempo no que gozaron dunha ampla variedade de actividades ao aire libre.

A rapazada puido visitar o bosque encantado de Aldán, onde descubriron edificacións de tempos pasados e fixeron un xogo de orientación. Tamén puideron realizar diferentes deportes na praia, como body surf, snorkel, sendeirismo ou bicicleta, descubrindo a fauna intermareal e o entorno da praia América. Os nenos e nenas concluíron a experiencia cunha visita ao monte Alba e unha tarde de piragüismo.

Pola súa banda, as rapazas e rapaces de 4º de primaria desprazáronse ás Fragas do Eume este martes 28, para pasar uns días no Ecoalbergue Alvarella, onde estarán ata este sábado 2. A súa viaxe comezou cunha parada previa no acuario da Coruña, onde gozaron dunha visita guiada. Ao longo desta semana, as nenas e nenos tiveron xornadas de praia, sendeirismo polas Fragas e piscina, ademais da actividade estrela do campamento, unha recreación dunha aldea prerromana, na que se pasa unha das noites.

Ademais, a cativada máis pequena dos campamentos, a de 5º e 6º de educación infantil, pasou polo que seguramente sexa o seu primeiro campamento, cunha estadía do 29 de xuño ao 1 de xullo no campamento Fervenzaventura, en Bandeira. Dende o primeiro día, as nenas e nenos gozaron do contacto cos animais, dándolle o biberón a unha tenreira, cepillando a unha egua, e alimentando a ovellas e coellos. Piscina, escalada, hípica e mesmo obradoiros de elaboración de queixos foron outras das actividades feitas pola rapazada.

Para a semana que vén, será a quenda dos campamentos urbanos da Aula da Natureza, dirixidos a nenos e nenas de 6 a 14 anos. A primeira quenda realizarase do 4 ao 15 de xullo, mentres que a segunda quenda será do 18 ao 29 de xullo. En canto ao alumnado de 3º de educación primaria, teñen como campamento de destino Galipark (en Padrón), e desenvolverase do 4 ao 8 de xullo. Tamén está programado para esta semana un campamento na Granxa Escola Bergando, en Negreira, do 6 ao 8 de xullo, pensado para o alumnado de 1º de educación primaria.

Novas relacionadas:

La Voz de Galicia: "Los campamentos de verano reúnen a 600 escolares en Arzúa y Melide"