As escolas infantís municipais ofertan novas prazas para que as familias interesadas poidan deixar aos seus fillos e fillas nestes centros durante o seu horario de traballo. Ademais, estas escolas están capacitadas con todo tipo de instalacións para cubrir perfectamente todas as necesidades do alumnado: sala de berces, comedor, cociña, lavandería, un almacén e aseos, sen esquecer un parque infantil exterior para os xogos dos máis pequenos.

As clases distribúense por franxas de idades: de 0 a 1 anos, de 1 a 2 anos e de 2 a 3 anos. Nas escolas infantís municipais son susceptibles de ser admitidos todos os nenos e nenas que teñen entre tres meses e tres anos, sempre e cando cumpran os tres anos antes do 31 de decembro de 2011. Para inscribirse tan só é necesario pasarse polo centro a recoller a carpeta da inscrición, cubrir o modelo e aportar a documentación necesaria. É preciso entregar todo antes do día 15 de abril. O horario para recoller e entregar a documentación será de 9:00 h. a 14:00 horas.

Documentación necesaria

As solicitudes deberán ir acompañadas da documentación acreditativa da situación familiar con dúas fotocopias compulsadas do libro de familia onde figure o alumno ou alumna para o que se solicita o ingreso. Ademais, aportará a fotocopia do DNI ou pasaporte dos pais/nais ou titores. Nas oficinas da escola solicitarase o certificado de empadroamento e convivencia que será expedido e incorporado ao expediente polo Concello de Ames.

Por outra banda, deberá aportarse a documentación acreditativa da situación económica con dúas copias cotexadas da última declaración da renda, de todos os membros da unidade familiar, ou, no seu defecto, o certificado emitido pola delegación de Facenda que avala a súa non presentación.

No caso dos profesionais autónomos deberase acreditar tamén os pagamentos fraccionados do ano correspondente, mentres que nos casos de nulidade, separación ou divorcio matrimonial a renda será a de quen exerza a patria potestade do pequeno. No caso de cursar estudos oficiais, acreditarase tal circunstancia, de igual forma que as persoas desempregadas aportarán o certificado do INEM.

Outra documentación complementaria sería a autorización para consulta de datos en facenda; modelo de aceptación do RRI; expediente do organismo correspondente por deficiencia física, psíquica ou sensorial ou enfermidade do neno ou dalgún membro da unidade familiar; o modelo de solicitude de cheque infantil; e outros documentos se proceden no que consten incidencias susceptibles de puntuación no baremo.

Presentación das solicitudes

O prazo de inscrición estará aberto dende o día 1 ata o 15 de abril. Haberá que pasar polas escolas infantís para recoller e entregar o modelo de solicitude (carpeta de cartón) onde o persoal prestará a axuda necesaria para cubrir debidamente o impreso.

Unha vez aceptada a solicitude, os nenos/as admitidos na gardería presentarán seis fotografías tamaño carné, a fotocopia do calendario de vacinas, a fotocopia da tarxeta sanitaria e o certificado médico.

Para máis información, os interesados ou interesadas poden dirixirse aos propios centros: a EIM O Bosque situada no número 28 da Avenida da Peregrina, en Bertamiráns; e a EIM A Madalena situada no número 16 da Praza da Madalena, no Milladoiro. Ou ben utilizar os teléfonos 981 891 111 e 981 538 433, respectivamente.

Escola infantil As Figueiras

Ademais a nova gardería As Figueiras, que leva preto dun ano en funcionamento, xa ten aberto o prazo de inscrición dende o 22 de marzo e pecharase o vindeiro 16 de abril. Este centro, que depende da Xunta de Galicia, dispón de 102 prazas, pero ao igual que no caso anterior este non é o número total de prazas dispoñibles para inscribirse.

Coa apertura desta gardería a localidade do Milladoiro pasou a ter dous centros educativos dedicados aos nenos e nenas de 0 a 3 anos. O novo centro educativo ten sete unidades escolares. Tamén dispón dunha sala de usos múltiples, un comedor, unha cociña, un xardín interior e unha lavandería.