[03-02-2015] As escolas deportivas municipais do Concello de Ames cumpren vinte e dous anos de actividade sumando un total de 1.575 usuarios. Nos pavillóns polideportivos, nas casas da cultura ou nos ximnasios do IES do Milladoiro e do CEIP Agro do Muíño impártense diariamente ata quince disciplinas distintas para todas as idades. Contan con preto de cen monitores do grupo Eulen e persoal dos clubs locais como o Bertamiráns FC, Milladoiro SD, CV Bruxas, Meigas FC e Patinaxe Sarela.
As actividades máis demandadas pola veciñanza amesá son pilates, patinaxe e tenis, con 288, 221 e 151 matrículas, respectivamente. Nalgunhas ensinanzas mesmo se esgotaron as prazas dispoñibles e hai usuarios en lista de espera. Con respecto ao ano anterior, incrementouse en 125 o número de usuarios e a tendencia vai en aumento. A oferta deportiva complétase con clases de aerobic, ballet, baloncesto, fútbol sala –masculino e feminino–, judo, natación, ximnasia rítmica e de mantemento, predeporte e spinning.
Para a concelleira de Deportes, Eugenia Martín, “a aposta pola práctica deportiva é fundamental nun concello coma o noso, un dos máis novos de Galicia”. Martín destaca o “óptimo funcionamento” das escolas municipais e sinala que a resposta dos usuarios é moi positiva: “o aumento das matrículas é un feito sinalado, especialmente entre o público feminino”.
A maior parte das sesións ofrécense no Milladoiro e en Bertamiráns pero outras, como ximnasia de mantemento ou pilates, tamén se ensinan nos locais sociais de Aldea Nova, Covas, Trasmonte, Biduído e Augapesada. As clases impártense dende outubro a maio e están dirixidas ás persoas empadroadas no Concello de Ames. O prazo de inscrición ábrese no mes de setembro e os prezos das matrículas van dende os 32 euros para os menores de 18 anos ata os 48 euros para os maiores de idade. Se se opta por acudir a máis dunha escola deportiva, o alumno obterá unha rebaixa do 25%.