“Achégate á praia fluvial de Tapia” é unha actividade que desenvolveron conxuntamente o Concello de Ames, o club de sendeirismo e montañismo “Rutasapie”, o club de piragüismo “Ribeiras do Tambre” e a Deputación da Coruña. A partir das 11:00 comezaba a andaina polo roteiro que creou o alumnado do obradoiro de emprego “Entre ríos”, e as primeiras piraguas tomaban contacto co río.

Máis de 30 persoas participaron na primeira ruta do rego do Andoriña organizada polo Concello de Ames. Dunha lonxitude bastante asequible, 5200 metros, a ruta segue o trazado deste pequeno regato nun tramo circular que ten a praia de Tapia como punto de saída e retorno. Se ben en pouco máis dunha hora pódese realizar o percorrido os e as camiñantes quixeron deterse de cando en vez para contemplar a paisaxe, desfrutar da natureza e coñecer algúns exemplos do noso patrimonio cultural e etnográfico.

A xornada de inauguración ao piragüismo rematou cos seus 30 participantes conseguindo manterse na piragua; ningunha persoa caeu ao río Tambre, o que ten moito mérito tomando en conta o elevado caudal do río despois das últimas choivas. Mesmo tres rapaces animáronse a realizar a inscrición para participar no curso de piragüismo que comezará o vindeir luns 27 de xuño. Estas actividades animaron ademais aos e ás participantes a facer un donativo en favor da Fundación “Tu ayuda= mi ilusión”.

Lémbrase que a praia fluvial de Tapia permanecerá aberta até o día 15 de setembro. Nela realizaranse, ademais do curso de piragüismo, distintas actividades.

Contido relacionado

El Correo Gallego:"Más de 70 personas disfrutan de una jornada en Tapia"
La Voz de Galicia:"La playa fluvial de Tapia acogió a 70 personas para unas actividades lúdicas"