TAGG Worldwide convidou ao alcalde de Ames, Blas García, á concelleira de Promoción Económica, Ana Belén Paz, e á concelleira de Promoción da Saúde, Susana Señorís, a un acto no que mostrou os novos produtos médicos que está producindo nas súas instalación de Bertamiráns. Trátase de novo material sanitario para as áreas de xinecoloxía, uroloxía, cirurxía xeral, e outras áreas médicas.

Nesta xornada tamén participaron importantes doutores/as e directores de empresas doutros países como Tom Gordy, CEO de CAST Surgical e de TAGG Worldwide, empresa americana de Atlanta; Antoine Keller, cardiólogo torácico de New Orleans; Farinaz Seifi, xinecóloga de Washington, Javier Magrina, xinecólogo da Mayo Clinic Arizona; e Vadim Morozov de Washington DC. Todos eles foron recibidos por Sergio Parente, director comercial e executivo de CAST Surgical e TAGG Worldwide.

O alcalde de Ames, Blas García, destacou que “é unha gran noticia que unha empresa de referencia internacional como TAGG Worldwide aposte por producir en Ames. Este tipo de proxectos sitúan o noso concello no mapa da innovación e da industria sanitaria de vangarda. Conic Vascular é unha empresa á vangarda no mapa da innovación e da produción na industria sanitaria e dende este concello non podemos estar máis contentos de que sexa embaixadora de Ames no mundo enteiro”.

Novos produtos médicos de TAGG Worldwide
Todas estas entidades e empresas mostraron o seu interese en coñecer os novos produtos médicos que está producindo TAGG Worldwide, por este motivo viaxaron ao concello de Ames co obxectivo de coñecer in sito o material médico no que está traballando a empresa amesá e ao mesmo tempo coñecer as súas instalacións. 

Asemade, dende TAGG Worldwide queren ter unha mención especial para o profesor e doutor, Helder Ferreira, xa que os días 16 e 17  de outubro, participaron no XVIII SPSMIN Congress, en Porto. TAGG Worldwide puido dar a coñecer os seus novos produtos médicos en dito congreso.

Dende TAGG Worldwide, o seu director executivo, Sergio Parente, explica que “quixemos mostrar os nosos últimos produtos a importantes doutores/as e directores de empresas doutros países e ao goberno municipal de Ames. Dende hai anos levamos traballando no concello de Ames co obxectivo de mellorar a produción de material sanitario e médico para mellorar vida da cidadanía. Todos estes novos produtos médicos serán producidos en Ames”.

Novas relacionadas:

El Correo Gallego: "Unha empresa asentada en Ames fabrica material médico para cirurxía xeral, uroloxía e xinecoloxía"

Diario de Santiago: "A empresa amesá TAGG Worldwide mostra os seus novos produtos médicos que fabrica en Bertamiráns"