O alcalde de Ames, Blas García, visitou xunto a Uxía García, concelleira de Benestar Social, esta semana a Edelmira Amado, veciña do Milladoiro que vén de cumprir 100 anos. O encontro permitiu trasladarlle os parabéns por esta data tan especial e coñecer algunhas das anécdotas e vivencias que atesoura ao longo dun século de vida
Edelmira amosou durante a visita o seu bo estado físico e a súa vitalidade. Nun ambiente próximo e familiar, o rexedor municipal compartiu un tempo de conversa coa homenaxeada e con parte da súa familia. Blas García agradeceu a acollida da familia e, especialmente, a atención de Verónica, filla de Edelmira, por facilitar a visita e permitir compartir este momento coa súa nai.
Un século de vida e de lembranzas
O centenario de Edelmira constitúe unha oportunidade para recoñecer a traxectoria das persoas maiores e o seu papel na memoria do municipio. As súas vivencias permiten achegar ás novas xeracións a historia das familias, das aldeas e dos núcleos urbanos de Ames.Con esta visita, o Concello quixo sumarse á celebración do centenario de Edelmira e trasladarlle o cariño da veciñanza amesá, así como os mellores desexos para seguir compartindo momentos coa súa familia e coas persoas máis achegadas.
