Dita exposición é un dos actos que organizou a Asociación Galega para Axuda Dos Enfermos con demencia tipo Alzheimer (AGADEA) con motivo do Día Mundial do Alzheimer. Trátase dunha mostra fotográfica que comezou no mes de setembro e que percorrerá diferentes concellos e entidades. O primeiro lugar da exposición foi o Centro Comercial de Área Central, en Santiago de Compostela, do 5 o 18 de setembro de 2016. Despois expúxose no Edificio do Novo Mercado, na Estrada, do 19 o 30 de setembro. Tamén estivo en Riveira, no centro sociocultural Lustres Rivas, e agora exporase na Casa da Cultura de Bertamiráns en Ames.

Algunhas das fotografías pertencentes aos usuarios e usuarias do servizo de estimulación terapéutica de Santiago de Compostela, A Estrada e Riveira, pero outras foron realizadas por fotógrafos profesionais (o fotógrafo Manuel Paz, que realizou as fotografías de maneira totalmente voluntaria en Riveira, e Jina Estrada Photo que realizou as fotografías en Santiago e A Estrada). Os veciños e veciñas de Ames poderán ver esta mostra na sala de exposicións da Casa da Cultura de Bertamiráns dende o 2 ata o 30 de decembro. Esta exposición conta con 33 fotografías e un panel informativo.

AGADEA é unha asociación sen ánimo de lucro, constituída en 1994 por un grupo de familiares de enfermos de alzheimer para buscar xuntos respostas, compromisos, apoios e recursos necesarios para coidar mellor, e con menos dificultades, aos seus enfermos. As actividades desta asociación organízanse para dar solución ás cuestións xa mencionadas, particularmente, reafirmando e mellorando a xestión de servizos, tanto de asesoramento aos familiares como de asistencia aos propios enfermos, e actividades de difusión para achegar á poboación ó coñecemento desta enfermidade.