A través dun texto de Diego Rey, no que teñen cabida cinco historias e unha ducia de debuxos dramatizados de Alfonso Daniel Rodríguez Castelao, a obra fai un percorrido por algúns dos textos e viñetas deste intelectual, achegando ao público a súa enxeñosa e fascinante forma de ver a Galicia do seu tempo, ofrecendo un mosaico composto de retrincos dunha realidade galega atemporal, que antecede e outorga raíces.

A partir da mirada de dous mortos, Pedro e Zeltia, de épocas, inquedanzas e idades moi diferentes e dun ollo de vidro que dá nova forma á realidade, os espectadores poderán ser quen de presenciar a vida dos homes e mulleres que habitaron esta terra. E grazas a ese ollo e o seu particular ollar seremos quen de comprender realmente a nosa historia e o noso presente.

Así se presenta Retrincos de Castelao, dirixida por Diego Rey, con Isabel Risco e Fran Rei na escena, con Producións Kukas tras da escenografía e máscaras, música e efectos sonoros a cargo de Jerry Noia, vestiario e atrezzo a cargo de Isabel Risco e maquinaria pesada baixo a responsabilidade técnica de Paula Castro.

O prezo das entradas é de dous euros a normal e dun euro a reducida. As mesmas están á venda na Billeteira electrónica. Tamén se poden mercar as entradas, de xeito anticipado e presencial, nas Casas da Cultura do Milladoiro e Bertamiráns, dirixíndose aos postos de conserxería e coa axuda dos técnicos do departamento de Cultura, de luns a venres, en horario de 10:00 a 13:00 horas. Ademais, resérvase o 10% das entradas para vender de xeito presencial unha hora antes do comezo do espectáculo.