Ao longo da xornada do sábado, a área deportiva do Milladoiro acolleu o festival Boom Clap Cultura Urbana, organizado pola Concellaría de Mocidade, a través da Oficina Municipal de Información Xuvenil (OMIX). Así, en horario de 12.00 a 24.00h, os numerosos participantes puideron asistir a diversos obradoiros participativos de turntablism dj, slackline ou grafitte, así como de parkour e skate, que foron os talleres máis demandados, e para cuxa práctica se habilitaron diferentes estruturas con rampas, caixóns e outros elementos.

Asemade, tamén tivo lugar unha exhibición de grafitte, na que se realizou unha pintura mural de varios metros, pintada a esprai sobre a parede do Pabillón Municipal de Milladoiro. Ao longo da xornada, estimase que pasaron polo festival arredor dunhas 500 persoas, que puideron participar e/ou contemplar as distintas iniciativas.

Sen embargo, a actividade que produciu maior expectación foi a “batalla de galos”, unha serie de competicións baseadas en enfrontamentos nos que o rap é o protagonista. Nesta acción, na que participaron 22 rapaces/as, os finalistas foron Valio, que alcanzou o primeiro posto e un premio de 150€, seguido de Kaos como segundo finalista, gañador dun talón por valor de 100€ e Lil Manin que acadou o terceiro posto e un premio de 50€.

Pola súa banda, aquelas persoas que quixeron actuar de forma individual, fora das batallas de galos, puideron facelo durante o espazo adicado a micro libre e actuacións locais. Ademais, para rematar a xornada, contouse coas actuacións dos subcampións da Disco Mix Club Spain, DJ Mil e DJ Webo, así como pequenas sesións dos participantes que se animaron a pinchar a súa propia música.