A Casa da Cultura do Milladoiro acolle este venres 11 de outubro, ás 18:30 horas, a representación da obra de teatro infantil O Príncipe e o parrulo, unha coprodución de Eme2 coa compañía de bonecos e actores Gorakada. Este espectáculo mestura as marionetas coa interpretación de dúas actrices, Rocío González e Lucía Regueiro, para contar unha fermosa historia sobre o valor da amizade e a solidariedade. A posta en escena é simple pero esconde un gran traballo, así como a música, composta por Fran Lasuen, que terá un papel protagonista. A dirección do espectáculo corre a cargo de Alex Díaz.

Nesta obra de teatro cóntase unha pequena historia, tan pequena que só precisa un castelo, unha árbore e unha casa para ser contada. Os nenos e nenas descubrirán que non hai nada tan divertido como ter alguén con quen compartir e con quen xogar. Decataranse que non hai nada tan grande coma un amigo. Este espectáculo está recomendado para nenos e nenas a partir dos 3 anos.

As entradas para asistir á función teñen un prezo de 4 euros para os maiores de 12 anos. Haberá un desconto do 50 por cento para os menores de 12 anos, estudantes con carné e maiores de 65 anos. As entradas poden reservarse ata o venres 11 de outubro, ás 14:00 horas, chamando ao número de teléfono 981 53 59 40 ou enviando un correo electrónico a cultura.milladoiro@concellodeames.org. As entradas reservadas terán que ser recollidas o día da función entre as 17:30 h e as 18:00 horas. As entradas que non se recollan nese horario serán vendidas a partir das 18:00 horas. Despacharanse un máximo de 4 entradas por persoa.