Na reunión participaron o director de comunicación da IAU e coordinador xeral do evento, John O’Regan, e o vicepresidente do Comité Técnico e delegado técnico do campionato, Tamás Molnar. Pola parte da organización local asistiron tamén Francisco Rico, coordinador do campionato a nivel local, Maribel Montes, secretaria xeral de dito campionato, así como Alberto Viaño e Iván Sanmartín, técnicos municipais de Deportes do Concello de Ames, xunto con membros do equipo técnico e do goberno municipal.

Desde o Concello de Ames destácase a satisfacción por poder ser sede dun campionato do mundo, un fito que recoñece a ampla experiencia do municipio na organización de probas deportivas e que supón un importante salto cualitativo na súa proxección deportiva. Así mesmo, sublíñase que este evento será un gran escaparate para dar a coñecer, a nivel nacional e internacional, todo o que o concello pode ofrecer, tanto na organización de eventos deportivos de primeiro nivel como para visitar e desfrutar da súa contorna, da súa gastronomía e do seu comercio.

Durante o encontro abordáronse aspectos organizativos e técnicos clave, así como a coordinación entre todas as partes implicadas. O principal obxectivo da xuntanza foi planificar os detalles fundamentais da proba, reforzar o traballo conxunto entre a IAU e o Concello de Ames e garantir que o campionato se celebre con éxito, cumprindo os máis altos estándares internacionais.

Desde o Goberno municipal expresouse a satisfacción pola estreita colaboración establecida, salientando o compromiso de Ames coa promoción do deporte de elite e coa organización de eventos internacionais que contribúen a poñer en valor o municipio e o seu tecido social e deportivo.

Novas relacionadas

La Voz de Galicia: "Comienzan las reuniones de coordinación para el mundial de 100 kilómetros"