A mostra do XI Certame de Artesanía Antonio Fraguas
Na mostra puideron verse as obras seleccionadas no certame de artesanía organizado pola Deputación da Coruña. O galardón, que constou de dúas modalidades (artesanía tradicional e contemporánea) tivo como fin pór en valor e axudar a difundir a artesanía de Galicia sendo un referente para todos/as os/as artesáns e artesás galegos/as. Unha das participantes neste certame foi a propia Ana Rosa Lista, artesá de encaixe e veciña das Punxeiras Altas, Ortoño.

Nesta edición número once, recibíronse un total de 137 pezas, que destacaron pola gran variedade das disciplinas e modalidades elixidas. Esta gran afluencia de participantes e a diversidade das súas pezas puxeron de manifesto que segue a existir unha gran vitalidade, capacidade creativa e rigor profesional na artesanía da nosa provincia. Mestres da cestaría, a escultura, a cerámica, a xoiaría ou a costura, entre moitos outros oficios, converten cada ano o Certame de Artesanía Antonio Fraguas nunha referencia para todos/as os/as artesáns e artesás galegos/as.

Entre as producións presentadas, mestúraronse traballos típicos e arraigados nos concellos coruñeses con novas creacións e innovacións, nas que se atoparon incluso pezas feitas a partir de materiais de refugallo, o que amosa que a artesanía segue a evolucionar e ten unha presenza importante no desenvolvemento da arte contemporánea. Deste xeito, puideronse apreciar traballos de xoiaría, cerámica, cestaría, escultura ou costura. Os gañadores desta edición foron: Pablo Carpintero, coa súa “Reprodución funcional da gaita de fol da Cantiga 350 das Cantigas de Sta. María” (categoría Artesanía Tradicional) e Lidia Nieves Domínguez pola obra “Xoguete” (categoría Artesanía Contemporánea).

Despois de dezasete días de exposición, este luns pola tarde clausurouse, na sala de exposicións do Pazo da Peregrina, a mostra das obras seleccionadas no XI Certame de Artesanía Antonio Fraguas. Ó acto de clausura, ademais de veciños e veciñas de Ames, tamén asistiron o alcalde, José Miñones, a concelleira de Promoción Económica e Turismo, Isabel González, e maila artesá de Ames, Ana Rosa Lista.

Durante o acto, a artesá, que estivo traballando na creación de novas obras no Pazo da Peregrina durante o tempo que durou a exposición, fíxolle entrega ao alcalde do escudo do concello de Ames feito en encaixe. A peza, que foi un agasallo para o pobo amesá, será colocada no Salón de Plenos da Casa do Concello, onde poderá verse exposta.

Asemade, Ana Rosa quixo destacar a sorpresa que lle despertou a reacción de moitos dos nenos e nenas que acudiron á exposición, que mostraron unha gran curiosidade e moita maña no palillado. Tanto foi así, que moitos dos cativos e cativas acercáronse varios días para mostrarlles a amigos e familiares a súa destreza palillando. Por iso, a amesá trasladou a idea de organizar algún obradoiro destinado aos nenos/as sobre o palillado.

Dende a concellaría de Promoción Económica e Turismo, pola súa parte, fíxose unha valoración positiva da mostra, destacando a gran acollida e o importante número de visitas recibidas durante os días que estivo aberta, en especial os fins de semana. Ademais, non só foi visitada por veciños e veciñas de Ames, senón que tamén por habitantes de municipios limítrofes e por varios grupos de outras comunidades autónomas que estaban a pasar uns días pola zona.

A raíz desta mostra, que durante a mañá do luns abriu especialmente para o colectivo Arcea-Adames, a concelleira Isabel González adiantou que se está a traballar en futuras colaboracións e novos proxectos coa artesá local Ana Rosa Lista. Tamén aproveitou para agradecer o traballo que está desenvolvendo Ana Rosa en prol da artesanía do encaixe, así como por expandir o nome de Ames polos distintos países onde a artesá mostra os seus traballos.

Contido relacionado

Compostela 24 horas: "Clausúrase a Exposición do XI Certame de Artesanía Antonio Fraguas"
Amsgo: "Clausurase a Exposición do XI Certame de Artesanía Antonio Fraguas con gran acollida"