Nove comercios: Patagonia, Careva, Mayzu e Nani’s Kids, no Milladoiro, e La Lola, A tenda de Fraber, Queens, José Sáenz e T3, en Bertamiráns, embárcanse con Chévere nesta aventura de facer teatro dentro dun escaparate. Unha comedia romántica con manequín, “Cambio de Tempada”, unha historia que fala de consultas a distancia “Telesaúde”, un recital lírico “Os tres tenores”, unha peza protagonizada por bailaríns pendurados; “Corcheiro&Percheiro” e unha videoinstalación “Mira aquí” compoñen o repertorio de  EscapÁrate!, o título coa que a Compañía Chévere presenta este proxecto que utiliza o teatro como ferramenta para a promoción e dinamización do pequeno comercio e como incentivo do consumo responsable.

As actuacións levaranse a cabo na tarde do venres no Milladoiro e o sábado en Bertamiráns. Para favorecer os grupos reducidos e renovar o público constantemente, faranse 2-3 e ata 4 pases de cada unha das peza. No Milladoiro, o primeiro pase realizarase ás 19:30 e o último ás 21:30. Ademais durante todo o día poderá contemplarse a videoinstalación “Mira aquí” en Nani’s Kids. En Bertamiráns, as sesións de mañá poderán contemplarse entre as 12:30 e as 13:45 e as da tarde entre as 21:00 e as 23:00 horas. Os  establecementos comerciais de Ames poderán ampliar os seus horarios de peche até ás doce da noite, sempre e cando cumpran a normativa de horarios e condicións laborais.

“No contexto da crise provocada pola Covid-19, faise máis necesario que nunca desenvolver accións de animación e promoción do comercio de proximidade, un dos sectores máis afectados. Con EscapÁrate! Convertemos os escaparates, auténtico sinal de identidade do comercio, en escenarios para o teatro. Trátase de poñer en valor o comercio retallista como espazo de socialización e reivindicar a compra-venda nunha relación de proximidade baseada no diálogo, de gozar do paseo a ceo aberto ou de deixarse sorprender polo aire na cara, polo cheiro a comida recentemente feita e pola teatralidade dos escaparates”, manifesta Xesús Ron, director artístico de Chévere.

A proposta contribúe a recuperar a actividade cultural e teatral no concello, mentres os teatros e centros culturais abren con grandes limitacións de capacidade. Porque esta é unha actividade na que o público está ao aire libre, durante un tempo breve, en grupos reducidos, favorecendo a distancia interpersoal e separado dos artistas.

Esta actuación forma parte do programa AmesON, encadrado no Plan Reactiva Ames, co que o Concello pretende dinamizar os sectores cultural e comercial de Ames. Podes consultar aquí os escaparates e os horarios dos pases.

Novas relacionadas:

La Voz de Galicia: "El AmesON arranca con Xoán Curiel y teatro en los escaparates"

El Correo Gallego: "Ames ten espazos teatrais onde había escaparates"

Revista AmsGO: "Chévere leva o teatro aos escaparates de Ames"

El Correo Gallego: "Teatro, música, cine e deporte nas fins de semana en Ames"