Nesta ocasión, ademais das sorpresas habituais desta noite máxica, os Reis Magos pensaron nun regalo que podería gustar a todos:o idioma. Así, o rei Melchor explicou que “para Ames trouxemos o saco do galego, o idioma que vos fai especiais e diferentes”. “Deixarémolo nas vosas casas para que o compartades co mundo enteiro e para que entre todos construamos un mundo mellor”, engadiu.

As súas maxestades tamén lle entregaron os premios aos gañadores e gañadoras do VII Concurso de cartas aos Reis Magos. A animación e a música tradicional a cargo do grupo Os Castros tamén estiveron presentes na recepción dos Magos de Oriente.

Ademais, nos pavillóns, os nenos e nenas de Ames atopáronse con moitas novidades que de seguro fixeron que a visita dos Reis Magos deste 2014 fose aínda máis especial. Para conseguir que os rapaces e rapazas gozasen en maior medida do paso das Maxestades de Oriente por Ames a recepción contou cunha mellor iluminación e sonido, que fixo da visita un momento inesquecible para todos. Deste xeito, dotouse aos pavillóns de distintos elementos de iluminación e sonido entre os que destacan luces de cabezas móbiles, cambiadores de color, canóns de seguimento, máquinas de fume e un completo sistema de sonido.

Nos pavillóns de Milladoiro e Bertamiráns, os Reis Magos foron recibidos polas autoridades do Concello de Ames, entre as que se atopaba o alcalde, Santiago Amor. O rexedor municipal agradeceu en nome do Concello de Ames a visita que os Reis Magos lle fixeron aos nenos e nenas das localidades do Milladoiro e de Bertamiráns. Santiago Amor comunicoulle ás maxestades de Oriente que “os máis pequenos de Ames foron moi bos ao longo de todo o ano, estudando, comportándose ben no colexio e facendo caso aos seus pais e nais nas súas casas”. O alcalde pideulle aos Reis Magos que se acordasen de todos os nenos e nenas, para que todos puidesen gozar da maxia desta noite.

Intervención do Rei Melchor
No nome das súas Maxestades falou o rei Melchor, que comezou a súa intervención “agradecendo a fermosa benvida que nos estades a dar en Ames”. Melchor avanzoulle aos nenos e nenas que “acabamos de chegar de Oriente cos sacos cheos de sorpresas e agasallos e non traemos carbón”.

A primeira parada da cabalgata foi ás 17:30 horas no pavillón do Milladoiro. Unha hora despois, os Reis Magos chegaban a Bertamiráns acompañados dunha numerosa comitiva. Con anterioridade, as maxestades de Oriente e os seus acompañantes fixeron un percorrido polas rúas, saudando ás persoas que os agardaban nas beirrarúas e repartindo caramelos. En total, as comitivas reais estiveron compostas por un total de 26 paxes, que repartiron 224 quilos de caramelos sen glute glute aptos para os nenos e nenas que son celíacos. A tradicional visita dos Reis Magos a Ames na noite do 5 de xaneiro reuniu a centos de persoas, adultos e nenos, nos pavillóns.

Aínda que se trata dunha noite de moitísimo traballo para eles, os Reis Magos quixeron facer unha parada en Ames para estar con todos os rapaces e rapazas e para escoitar as súas peticións, que xa recibiron mediante correo postal. Os Reis Magos repartiron entre os nenos e nenas de Ames caramelos e ilusión un ano máis.