O certame ten dúas modalidades (narrativa e poesía), e en cada modalidade establécense tres categorías, de xeito que poden participar persoas de calquera idade. A primeira categoría vai ata os 13 anos; a segunda dos 14 aos 17 anos; e a terceira de 18 anos en diante. No XIII Certame Literario Concello de Ames presentáronse un total de 152 traballos, distribuídos do seguinte xeito: na primeira, segunda e terceira categoría de poesía houbo 24, 4 e 46 obras presentadas respectivamente, mentres que nas tres categorías de narrativa presentáronse 19, 10 e 49 traballos, respectivamente. Así, na modalidade de poesía houbo 74 traballos mentres que en narrativa presentáronse 78.

De todos os participantes foron catro os veciños e veciñas de Ames galardoados este ano. Xosé Anxo Corral Suárez fíxose co primeiro premio no apartado de narrativa para adultos (de 18 anos en diante) polo texto Zona de sombras. Sofía Álvarez Castro acadou o segundo posto na primeira categoría de narrativa (ata os 13 anos) coa obra Memorias da señora Cupcake. Ademais, Marcos Maira Castro obtivo tamén o segundo posta na segunda categoría de narrativa (dos 14 aos 17 anos) co traballo A xustiza pola man. Deste xeito, houbo un gañador de Ames en cada categoría da modalidade de narrativa.

Por outro lado, Heriberto José Villar Patiño levou o primeiro premio de poesía da terceira categoría (adultos de máis de 18 anos) coa obra A pel arrincada dos soños. A concelleira de Normalización Lingüística, Isabel Vaquero, sinala que “o balance desta décimo terceira edición do certame literario é moi positivo xa que presentaron un gran número de traballos e catro persoas de Ames obtiveron dous primeiros premios e dous segundos. A creación literaria na nosa lingua segue sacando músculo no noso país e no noso concello”.
O xurado, que estivo composto polos escritores Manuel Núñez Singala e María López Sández, e mailo crítico literario Armando Requeixo Cuba, coincidiu en destacar a alta calidade dos traballos presentados este ano ao certame literario.

Este certame literario é xa un concurso de referencia dentro do mundo da poesía e a narrativa, que permite dar a coñecer as novas voces da literatura galega. Os tres primeiros clasificados nas distintas categorías recibirán premios en metálico que oscilan entre os 90 e os 260 euros. A entrega terá lugar este venres, 13 de maio, ás 20:00 horas, na Casa da Cultura do Milladoiro, nun acto no que o Concello de Ames conmemora o Día das Letras Galegas. As obras gañadoras publicaranse nun libro colectivo que recompila os mellores traballos de cada edición.

VIII Certame artístico-literario Intercentros
Hai uns días tamén se fallaron os premios da oitava edición do certame artístico-literario Intercentros dirixido ao alumnado amesán. O concurso consta de dúas categorías. Na primeira participaron nenos de 3º e 4º de primaria e o primeiro premio foi para o texto O himno pola diversidade, escrito por Iago Blanco e Damián Del Río, alumnos de 4º do CEP de Ventín. Na segunda posición quedou Noa de Blas Sánchez (alumna de 3º do CEIP Agro do Muíño) coa obra Estrela Lois e os cincentos, mentres que a terceira posición foi para o texto Os galegos invadimos o mundo co noso sabor e a nosa lingua, de Sofía Chang e Andrea García, alumnas tamén de 4º do CEP de Ventín.

Na segunda categoría participaron escolares de 5º e 6º de primaria e as obras gañadoras foron O mundo en gris, de Sara Morán Alonso (5º do CEIP Agro do Muíño); A forza da nosa lingua, de Sabela Souto González (5º do CEIP Agro do Muíño) e en terceiro lugar As diferenzas que nos unen, de Natalia Paz Peláez (5º do CEIP A Maía).

Photocall de Manuel María
Con motivo da celebración do Día das letras Galegas, este martes, 10 de maio, vaise colocar un photocall de 2x2 coa imaxe gráfica da celebración do Día das Letras Galegas, durante 3 horas aproximadamente, na praza de Manuel Murguía, no Milladoiro. Haberá dúas persoas para fotografar a quen se anime a participar suxeitando versos de Manuel María co photocall de fondo. Esas fotos subiranse posteriormente ás redes sociais. A veciñanza amesá está convidada a pasar por alí, de 17:00 a 20:00 horas. Se o tempo non acompaña, esta actividade trasladarase á Casa da Cultura do Milladoiro.

Contido relacionado

La Voz de Galicia: "Café e photocall «Manuel María somos nós»"