[28-06-2013] O grupo de Teatro Down Compostela representou este venres 28 de xuño, ás 20:00 horas, a obra “Vodas de Sangue” no auditorio da Casa da Cultura do Milladoiro. Este grupo de teatro, dirixido por Lucas Herrador, está composto por mozos con Síndrome de Down e discapacidade intelectual, alumnos do Ciclo Superior de Animación Sociocultural de Pontepedriña e voluntarios/as. É a quinta obra que representa o Grupo de Teatro Down Compostela, que conta co financiamento de La Caixa.
Tras o éxito conseguido no Salón Teatro de Santiago de Compostela, os 26 integrantes do Grupo de Teatro Down Compostela volveron subirse ao escenario para representar de novo a obra de Federico Gacía Lorca “Vodas de Sangue”. No Auditorio da Casa da Cultura de Milladoiro, estes actores volveron dar mostras do seu bo facer e o traballo realizado durante os últimos meses.
Son moitos os mozos desta compañía teatral que, tras anos interpretando, queren dedicarse profesionalmente á carreira de actor ou actriz. A interpretación é, sen dúbida, a paixón de Elías Ledo, un dos membros deste grupo, que comenta “xa teño bastante experiencia e actuar paréceme fácil”.
