[19-12-2015] A compañía Caramuxo Teatro é experta en achegarse ao público máis novo a través da música, do baile, dos monicreques e do teatro. Combinando diferentes disciplinas tecen historias que conectan cos pequenos e pequenas da casa. Este ano visitan a Casa da Cultura de Bertamiráns este martes, 22 de decembro, ás 17:00 horas, cunha obra protagonizada por un dos parrulos máis famosos da literatura.
Feo! é a adaptación dos membros de Caramuxo da coñecida historia de Hans Christian Andersen, un espectáculo que renova a historia dun parrulo que, na súa etapa de crecemento, se sinte diferente dos demais. A compañía traslada ao público á fábrica de parrulos de goma "Il Papero Giallo" que produce cada día centos de parrulos de goma de cor amarelo e do mesmo tamaño. Mais, un día, a fábrica produce un parrulo cunha cor distinta da do resto...
Esta obra represéntase este martes 22 de decembro, ás 17:00 horas, na Casa da Cultura de Bertamiráns. Se ben está dirixida aos máis pequenos, foi creada para entreter a toda a familia. As entradas para asistir a esta función teñen un prezo de 4 euros para os maiores de 12 anos. Haberá un desconto do 50 por cento para os menores de 12 anos, estudantes con carné e maiores de 65 anos.