O Concello de Ames, mediante o Programa de Cooperación das entidades locais para a contratación de traballadores desempregados posto en marcha pala Consellería de Traballo e Benestar da Xunta de Galicia, contratou por un período de seis meses -do 2 de agosto de 2010 ao 2 de febreiro de 2011- a cinco peóns, tres homes e dúas mulleres. Os novos traballadores levaron a cabo tarefas de limpeza, prevención de incendios e adecuación das beiras de regos e regatos.

Contaron dende o primeiro momento aos traballadores de todo o material necesario. Así, os peóns forestais contaron con roupa, un vehículo todoterreno, desbrozadoras, motoserras, etc. O custe deste material foi asumido por completo polo Concello de Ames. A contía da subvención da Xunta de Galicia foi de 58.490 euros.

Os cinco operarios foron elixidos, como nos casos anteriores, a través dun proceso selectivo dunha listaxe de desempregados, remitida desde o Instituto Nacional de Emprego (INE).

Con este programa pretendíase valorizar os recursos ambientais do espazo forestal do concello de Ames e do contorno das marxes fluviais, polo que se levaron a cabo accións de limpeza de maleza e lixo, prevención de incendios e adecuación das beiras de regos e regatos.

Traballos de prevención contra o lume

Os traballos comezaron en agosto, etapa de máximo risco de incendios, forestais, polo que as primeiras labores desta brigada consistiron en realizar tarefas preventivas como a xestión da biomasa forestal nas vías e camiños de titularidade municipal realizándose ditos traballos no estrato arbóreo, arbustivo e subarbustivo.

Así, nas primeiras seis semanas limpáronse un total de 9,786 quilómetros de pistas forestais e 1.827 metros cadrados no Pedregal, Ortoño, preto da zona queimada, na que se realizaron estas labores por prevención. Debullados os números por parroquias, en Lens limpáronse 275 metros de camiños de titularidade municipal, en Tapia 500 metros, en Piñeiro 2.524, en Trasmonte 693, en Ames 1.714, en Ortoño 175 -aos que hai que engadir os xa citados 1.827 metros cadrados de prevención-, en Ameixenda 2.204 e en Agrón 1.701 metros. Estes traballos realizáronse a un bo ritmo, 80 metros por persoa cada día, e consistiron na limpeza e triturado da vexetación, triturado que se realiza para que non haxa que retirala e que supón aumentar o tempo invertido nestas labores.

Ademais, tamén se realizaron labores de limpeza e acondicionamento da finca do concello onde se sitúa o pozo do que os helicópteros extraen auga para apagar os lumes.

Acondicionamento das marxes fluviais

A brigada de cinco operarios tamén se encargou, a comezos de setembro e coincidindo coa baixada das temperaturas, de realizar os traballos de acondicionamento das marxes fluviais do concello. Así, estes cinco traballadores comezaron co desleixo dunha ruta no roteiro de Sar dende a depuradora e desbrozaron a zona de servidume comprendida entre esta e o muíño de Sisalde.

En total, levouse a cabo unha roza manual e selvática da vexetación e retirada de lixo de 6.893 metros liñais -6,90 km- e un total de 9.460,7 metros cadrados. Ademais dos traballos de desbroce, os e as traballadoras da brigada municipal encargáronse da recollida de residuos, de xuntar e retirar madeira e polas, da eliminación de maleza, e de podar e recoller os restos producidos por esta actividade, que supuxeron un total de 5.500 Kg que foron levados á planta de compostaxe de Servia. O lixo retirado por esta brigada -pneumáticos, electrodomésticos, rodas, restos de obras, etc- súmanse ás preto de 7 toneladas que xa foran retiradas por anteriores brigadas e enviadas ao punto limpo do concello.

Tamén realizaron traballos de despexe da saída do río Pego cara o Sar, o desbroce selectivo da zona do paseo fluvial e a eliminación de herbas invasoras -coma a herba da Pampa que había na entrada da ruta do Sar-. Así, xunto coa detección de especies invasoras, o desbroce selectivo das beiras e canles, a recollida de lixo nestes lugares e o mantemento do itinerario "As beiras do río Sar", tamén se levaron a cabo labores de mellora das condicións de certas plantas introducidas en actuacións precedentes.

Traballos no viveiro municipal e outras actuacións

Os e as traballadoras desta brigada foron tamén os responsables da necesaria limpeza, desbroce e acondicionamento do viveiro municipal.

Ademais, realizaron outro tipo de labores como o mantemento do monte escolar de Ames, a limpeza e protección dos paneis interpretativos da ruta ambiental do río Sar, lixando, vernizando e afianzando as partes destes paneis máis danadas.

Deste xeito, os traballos realizados por estas dúas mulleres e tres homes integrantes da brigada municipal de xestión do espazo forestal e fluvial foron de especial importancia á hora de manter a limpeza e acondicionamento necesario dos espazos naturais do concello, así como á hora de manter ás especies autóctonas e controlar ás especies invasoras que poñen en perigo a supervivencia destas. Cabe destacar, ademais, que todas estas tarefas se realizaron respectando a biodiversidade das zonas intervidas.

A nova noutros medios dixitais:

Contido relacionado

La Voz de Galicia: "La brigada de Ames limpió diez kilómetros de pistas"
La Voz de Galicia: "La brigada de Ames limpió diez kilómetros de pistas"
La Voz de Galicia: "La brigada de Ames limpió diez kilómetros de pistas"
La Voz de Galicia: "La brigada de Ames limpió diez kilómetros de pistas"
El Correo Gallego: "La brigada forestal de Ames limpió cerca de diez kilómetros de pistas"
El Correo Gallego: "La brigada forestal de Ames limpió cerca de diez kilómetros de pistas"
El Correo Gallego: "La brigada forestal de Ames limpió cerca de diez kilómetros de pistas"
El Correo Gallego: "La brigada forestal de Ames limpió cerca de diez kilómetros de pistas"