A Concellaría de Vías, Obras, Parques e Xardíns continúa desenvolvendo actuacións para manter e mellorar os espazos abertos municipais, que sofren un constante desgaste polos axentes atmosféricos aos que se atopan expostos, así como polo uso diario. A semana pasada a brigada de obras comezou a repintar as prazas de estacionamento que están destinadas ás persoas que teñen algún tipo de discapacidade.

Os traballos comezaron o pasado xoves 26 de xaneiro. Primeiro a brigada de obras municipal está repintando as prazas de aparcadoiro de minusválidos de Bertamiráns. Se non chove está previsto que en Bertamiráns se remate esta semana. A vindeira semana comezarase co repintado das prazas de aparcamento de minusválidos do Milladoiro. Primeiro, límpase ben a praza de aparcadoiro para despois pintar as liñas e marcas que delimitan a zona. É importante que a praza de estacionamento estea ben limpa e sen po para que despois pegue ben a pintura.

O Concello de Ames, a través da Concellaría de Vías, Obras, Parques e Xardíns, está levando a cabo un plan de mellora e repintado das marcas viarias. Primeiro, no pasado mes de outubro, desenvolvéronse os traballos de repintado dos pasos de peóns de varias rúas do Milladoiro e de Bertamiráns. Agora estase facendo o mesmo, pero coas prazas de estacionamento de minusválidos de Bertamiráns e do Milladoiro.