As bibliotecas municipais de Ames organizaron un concurso con motivo da conmemoración do Día Internacional do Libro infantil que se celebra o vindeiro domingo 2 de abril. Esta actividade está dirixida aos aos rapaces e rapazas escolarizados dende primeiro de educación primaria ata segundo de secundaria.

Dito concurso consistirá en ler un libro de Andersen en galego; escoller un personaxe do conto; facer un debuxo dese personaxe, tal e como imaxinaria Andersen na actualidade; escribir un breve texto, como se fose para twitter, que non exceda de 140 caracteres, explicando cal foi o motivo polo que se fixo a escolla dese personaxe; e entregalo na biblioteca.

Cada traballo terá que levar os datos de identificación dos participantes: nome, apelidos, idade, data de nacemento e curso escolar, así como o nome da persoa da biblioteca, o enderezo e un teléfono de contacto. Deberán figurar os datos do libro a partir do cal fixeron a escolla da personaxe: autor e título. Os traballos deberanse entregarse nas bibliotecas de Bertamiráns e do Milladoiro, onde se preseleccionaran tres por cada categoría.

Establécese un premio para cada unha das seguintes categorías: primeiros lectores (1º, 2º, 3º de primaria); lectorado avanzado (4º, 5º, 6, de primaria) e superlectores (1º e 2º de secundaria). Cada premio estará dotado cun diploma e un lote de libros para as persoas premiadas e para a biblioteca na que se entreguen os traballos.