Nunha visita realizada a comezos do mes de febreiro o alumnado que participa neste máster puido coñecer as instalacións da Aula da Natureza e presentaron varios traballos de distintas temáticas, coma “A biodiversidade da mata atlántica” ou “Os lemúridos de Madagascar”. O director e profesor do máster, Carlos Otero, explica que a materia do curso se divide en clases teóricas e un traballo relacionado coa biodiversidade cuxa temática pode ser elixida libremente polos alumnos.

A Concellaría de Medio Ambiente do Concello de Ames, que dirixe María Eugenia Martín, está traballando para que as universidades galegas e outras entidades teñan en conta a Aula da Natureza de Ames coma unha entidade medio ambiental coa que poden contar para diferentes actos. Previsiblemente, a Aula da Natureza será sede de cursos de verán da USC e de charlas de temática relacionada co medio ambiente e co desenvolvemento sostible.

Os alumnos/as do máster de Biodiversidade e conservación do medio natural, dependente do departamento de Zooloxía e Antropoloxía Física da USC, realizaron unha sesión de prácticas nas instalacións da Aula da Natureza. O alumnado recolleu mostras en varios regatos nos concellos da Serra de Outes e Ames (en Augapesada e Riamontes), para posteriormente analizar a composición dos macrobentos nas instalacións da Aula da Natureza co fin de coñecer as súas características morfolóxicas, etolóxicas e ecolóxicas.

Ademais, a través desta actividade o alumnado valorou o estado de coñecemento, singularidade e valor de conservación da fauna ibérica, dedicando unha especial atención á fauna galega; e dispuxo dunha panorámica dos factores que inciden de forma negativa sobre a nosa fauna de macroinvertebrados. O principal obxectivo desta sesión de prácticas foi coñecer as principais técnicas de recolección, separación en vivo, conservación e identificación dos grupos máis representativos das augas continentais galegas.