A programación municipal de primavera inclúe unha ruta de senderismo polo Salto do Nervión e polo parque natural de Valderejo, que organiza a asociación Rutasapie, en colaboración co Concello de Ames. Esta actividade desenvolverase os días 13, 14, 15 e 16 de abril aproveitando os días festivos de Semana Santa. O xoves 13 realizarase unha ruta lineal de 7 quilómetros de percorrido polo Salto do Nervión, e unha visita o lugar de Frías, un dos pobos máis bonitos de España.

A programación desta iniciativa deportiva continuará o día seguinte, o venres 14, que se fará unha ruta lineal de 11 quilómetros, de dificultade moderada, polo pico de Humión. Ese mesmo día tamén está prevista unha visita guiada con degustación a Salinas de Añana. Para o sábado 15 organizouse unha ruta circular de 23 quilómetros polo parque natural de Valderejo. Por último, o domingo 16 realizarase unha visita pola cidade de Bilbao, e ás 16:00 horas, regresarase cara Santiago. A chegada está prevista para as 23:30 horas.

Os participantes nesta actividade estarán aloxados no Hostal José Luís (Trespaderne). O prezo de inscrición (que inclúe tanto o transporte como o aloxamento, almorzos e ceas) é de 229 euros para persoas non federadas, e de 220 euros para as que si o están. Para inscribirse ou solicitar máis información pódese enviar un correo electrónico ao enderezo clubrutasapie@gmail.com ou chamar aos teléfonos 628 287 957 ou 675 680 159.

A saída realizarase o xoves, 13 de abril, ás 01:00 horas, dende a estación de autobuses de Santiago de Compostela. Este mesmo autobús pasará pola estación de tren, ás 01:10 horas, e ás 01:20 horas polo aparcamento de Santa Marta.