O que comezou sendo unha festa para reunir os socios e socias da Asociación de Veciños de Covas derivou co tempo nunha boa ocasión para degustar orella, tomar empanada, escoitar algo de música e pasar un bo tempo entre veciños e veciñas. A idea de introducir a orella de porco como prato protagonista desta celebración foi do antigo presidente da asociación, Manolo Martínez. El mesmo, con experiencia profesional nos fogóns e como camareiro, é o encargado de preparalo para os máis dos 200 invitados e invitadas que acoden a Covas cada ano.

Co paso do tempo á orella uníronselle o chourizo, as empanadas de bacallau e de bonito, a sobremesa en forma de empanada de mazá, o viño, os refrescos e o café para rematar. O prezo do menú, a pagar no mesmo campo da festa, é de 7 euros. A música foi este ano unha achega á festa do Concello de Ames: a banda de gaitas Os Castros actuará este sábado pola noite para amenizar a cea. Dende a Asociación de Veciños de Covas queren tranquilizar ao público: unha carpa foi instalada como forma de prevención ante unha previsión meteorolóxica que anuncia chuvias febles.

Esta non é a única labor que leva a cabo a Asociación de Veciños de Covas. Os seus membros explican que organizaron actividades de zumba e ximnasia de mantemento en pasados cursos, estiveron durante un tempo a cargo das festas parroquiais de Santo Estevo de Covas e, ademais, colaboran activamente coa Escola Unitaria da parroquia. A súa dedicación na recuperación da memoria da parroquia fai que a mestra da escola conte coa asociación para transmitir o que saben os seus membros aos máis pequenos e pequenas.