O Concello de Ames recuperou no ano 2022 a tradicional festa dos maiores, que se celebrou a comezos do mes de xullo. Posteriormente, en 2023 decidiuse que a festa dos maiores íase a realizar o martes de Entroido. Deste xeito, déuselle continuidade a dita festa coa segunda edición do cocido dos maiores de Ames.

O ambiente festivo e de entroido foi o predominante no cocido dos maiores de Ames, que se celebrou este martes de Entroido no pavillón municipal do Milladoiro. A festa, á que asistiron arredor de 800 persoas, deu comezo ás 14:00 horas coa entrada dos camareiros e camareiras que repartiron o cocido por todas as mesas habilitadas. Antes de comezar o xantar o alcalde de Ames, Blas García, dedicou unhas palabras de agradecemento a todas as persoas que asistiron á festa dos maiores.

O rexedor municipal dixo “os maiores son unha parte esencial da nosa sociedade. O martes de entroido no concello de Ames será sempre o seu día e, este cocido, unha forma de agasallalos e recoñecer toda unha vida de esforzo. Este é un día para que desfruten e o pasen en grande”.

Trala comida houbo moita diversión e música a cargo do dúo Matices que amenizaron a festa coa súa música de sempre. Uns clásicos coñecidos por todos e todas que fixeron bailar e cantar a todos/as os/as nosos/as maiores. Tamén se sortearon tres cestas con produtos de entroido entre os asistentes. Ademais, premiouse aos tres mellores disfraces con outras tres cestas de produtos de entroido.  

Para facilitar a asistencia a dito evento, o Concello de Ames puxo a disposición da veciñanza un servizo de autobús que pasou polas parroquias para recoller ás persoas que así o solicitaron e achegalas ata o pavillón do Milladoiro. Ao final da festa tamén houbo servizo de autobús para regresar a casa.

Unha boa parte da Corporación municipal encabezada polo alcalde, Blas García, tamén participou na festa. Deste xeito, por parte do goberno municipal asistiron a concelleira de Servizos Económicos, Deportes e Promoción da Saúde, Susana Señorís; o concelleiro de Urbanismo, Administración Xeral e Mobilidade, Víctor Fernández; a concelleira de Promoción Económica, Emprendemento e Atención e Participación Veciñal, Ana Belén Paz; o concelleiro de Obras e Servizos Básicos, Gustavo Nieto; a concelleira de Benestar Social, Igualdade e Voluntariado, Uxía García; o concelleiro de Xestión do Medio Natural, Atención ao Rural, Transparencia e Patrimonio, Javier Antelo; e maila concelleira de Planificación e Xestión Educativa e Mocidade, Carmen Porto.  

Por outra banda, do Partido Popular de Ames asistiron as concelleiras e concelleiros; Oliva Agra, Ana María Coto, Pablo Beiroa, José Ramón Oulego, Roberto Martínez e María Mercedes Martínez.

Novas relacionadas:

La Voz de Galicia: "Ochocientas personas en la fiesta del «cocido dos maiores» de Ames"

El Correo Gallego: "Cocido para 800 en Ames: “Estaba boísimo, moito mellor que o do ano pasado, e con baile”"

Ames Go: "800 maiores asistiron ao Xantar de Entroido organizado polo Concello"