O 30 de xaneiro celébrase o Día da Paz. Con motivo desta celebración a Biblioteca Municipal de Ames fixo xirar a súa programación de xaneiro arredor dun concepto tan importante como a paz, un valor para as xeracións máis novas que puideron aprender sobre esta ao longo destes días.

Concienciar aos máis novos sobre a importancia da paz foi o obxectivo da programación de xaneiro da Biblioteca Municipal de Ames. Baixo o lema "Xaneiro: só tres letras, PAZ"os nenos e as nenas puideron asistir a unha serie de actividades de contacontos e obradoiros nas que aprenderon sobre a paz e a súa importancia, como un valor a transmitir ás xeracións máis novas.

Unha das iniciativas encadradas dentro desta campaña pola paz foi a celebración de dous obradoiros monográficos dirixidos aos cativos maiores de oito anos. Estes tiveron lugar ás 18:30 horas do mércores 26 na Biblioteca de Bertamiráns e o xoves 27 na Biblioteca do Milladoiro. Estas actividades tiveron unha gran acollida xa que preto de 20 nenos/as participaron en cada unha das bibliotecas municipais. En total foron 40 os rapaces e rapazas que asistiron a estas actividades.

Nestes obradoiro fixéronse diferentes actividades, como poden ser un xogo de mesa con preguntas relativas á paz ou dar información aos nenos sobre figuras significativas na defensa da paz para que aprendan sobre elas. Ademais, os cativos puideron xogar á oca da paz e elaboraron o símbolo da paz con plastilina. Tamén gozaron con outros xogos como buscar nun mapa a palabra paz escrita en diferentes idiomas.

A programación de actividades da biblioteca municipal continua e para o mes de febreiro está previsto un obradoiro de poesía para os días 9 e 10 de febreiro. Para participar neste obradoiro hai que inscribirse entre o 24 de xaneiro e o 5 de febreiro nas bibliotecas. Neste obradoiro os nenos e nenas poderán participar en diferentes actividades como a construción de pequenos poemas e rimas. Tamén poderán facer pareados e relatar trabalinguas.