Os equipos, e como paso previo á competición, iniciaron a pasada semana as sesións formativas. Hoxe xoves 22, Santa Comba acolleu a formación do alumnado local ademais do de Ames e Carballo. Dos institutos amesáns participaron arredor de 40 alumnos/as e 4 profesores/as que forman tres equipos, un equipo do IES do Milladoiro e dous do instituto de Bertamiráns. Estas xornadas de formación organízanse co obxectivo de que as mozas e mozos se familiaricen co desenvolvemento dos debates e reciban asesoramento sobre técnicas de comunicación oral e argumentación.

As xornadas de formación comezaron o pasado mércores, 14 de xaneiro, en Betanzos, onde alén do propio alumnado betanceiro inscrito acudiu alumnado dos centros educativos de Ferrol, Narón e Pontedeume. De seguido, Vilagarcía de Arousa acolleu o xoves 15 a segunda xornada formativa, coa asistencia de alumnado vilagarcián ademais do procedente de Pontevedra e Rois. Este pasado mércores, 21 de xaneiro, impartiuse a terceira xornada en Arzúa, para os centros inscritos da propia Arzúa, Santiago de Compostela e Teo.

Proxecto de dinamización lingüística
O Club de Debate Alingua é un proxecto de dinamización lingüística organizado desde varios concellos polas áreas respectivas de normalización lingüística lingüística, para favorecer o emprego da lingua galega entre a mocidade, especialmente os usos orais en contextos formais e informais. Ademais, contribúe a promover o pensamento crítico e analítico e fomentar a diversidade de opinións, tolerancia e traballo en equipo.

Alén do propio evento competitivo, o Club de Debate Alingua promove a creación de espazos de socialización e convivencia para activar a lingua galega a través do conxunto de actividades propostas: as xornadas de formación e as intensas xornadas de debate, que inclúen tempo para o lecer con actividades de convivencia entre o alumnado participante.

Novas relacionadas:

Bisbarra: "O Club do Debate Alingua organizou a cuarta xornada formativa en Santa Comba"